ന്യൂഡല്ഹി: സൗദി അറേബ്യയിലെ പുണ്യനഗരമായ മക്കയ്ക്ക് സമീപം ഡ്രോണ് ആക്രമണം നടന്നെന്ന റിപ്പോര്ട്ടുകളില് അഗാധമായ ആശങ്ക രേഖപ്പെടുത്തി ഇന്ത്യ. സൗദിയുടെ പരമാധികാര പ്രദേശത്തിന് നേരെയുള്ള ആക്രമണങ്ങളെയും സാധാരണക്കാരുടെ ജീവനും അടിസ്ഥാന സൗകര്യങ്ങള്ക്കും ഭീഷണിയാകുന്ന നടപടികളെയും ഇന്ത്യ ശക്തമായി അപലപിച്ചു. മേഖലയില് സമാധാനവും സ്ഥിരതയും എത്രയും വേഗം പുനഃസ്ഥാപിക്കണമെന്നും ഇന്ത്യ ആവശ്യപ്പെട്ടു.
”മക്കയ്ക്ക് സമീപമുണ്ടായ ഡ്രോണ് ആക്രമണത്തില് ഞങ്ങള്ക്ക് അഗാധമായ ആശങ്കയുണ്ട്. സൗദി അറേബ്യയുടെ പരമാധികാര പ്രദേശത്തിന് നേരെയുള്ള ആക്രമണങ്ങളെയും സാധാരണക്കാരുടെ ജീവനും അടിസ്ഥാന സൗകര്യങ്ങള്ക്കും ഭീഷണിയാകുന്ന നടപടികളെയും ഇന്ത്യ അപലപിക്കുന്നു,” വിദേശകാര്യ മന്ത്രാലയ വക്താവ് രണ്ധീര് ജയ്സ്വാള് പ്രസ്താവനയില് പറഞ്ഞു.
ലോകമെമ്പാടുമുള്ള മുസ്ലിങ്ങള്ക്ക് പ്രത്യേക പ്രാധാന്യമുള്ള നഗരമാണ് മക്കയെന്നതിനാല് സംഭവത്തെ അതീവ ഗൗരവത്തോടെയാണ് കാണുന്നതെന്നും ജയ്സ്വാള് വ്യക്തമാക്കി. മേഖലയില് സമാധാനവും സ്ഥിരതയും എത്രയും വേഗം പുനഃസ്ഥാപിക്കപ്പെടുമെന്ന് പ്രതീക്ഷിക്കുന്നതായും അദ്ദേഹം കൂട്ടിച്ചേര്ത്തു. ചൊവ്വാഴ്ച വൈകിട്ട് മക്കയുടെ തെക്ക് ഭാഗത്ത് സൗദി വ്യോമ പ്രതിരോധ സേന ഡ്രോണ് തടഞ്ഞ് തകര്ത്തതായി സൗദി നേതൃത്വത്തിലുള്ള സഖ്യസേന അറിയിച്ചു. മക്കയുടെ നിരോധിത വ്യോമാതിര്ത്തിയില് പ്രവേശിക്കുന്നതിന് മുമ്പായിരുന്നു നടപടി.
ഡ്രോണ് തകര്ന്നുവീണത് നഗരത്തിന് തെക്ക് ഭാഗത്താണെന്നും സൗദി സഖ്യസേന വക്താവ് തുര്ക്കി അല് മാല്ക്കി അറിയിച്ചു. ഡ്രോണ് ഹൂതികള് വിക്ഷേപിച്ചതാണെന്നാണ് സൗദി സഖ്യസേനയുടെ ആരോപണം. മക്കയുടെയും രണ്ട് പുണ്യപള്ളികളുടെയും തീര്ഥാടകരുടെയും സുരക്ഷ ‘റെഡ് ലൈന്’ ആണെന്നും അല് മാല്ക്കി മുന്നറിയിപ്പ് നല്കി. 2017ലെ ബാലിസ്റ്റിക് മിസൈല് സംഭവത്തിന് പിന്നാലെ മക്കയെ ലക്ഷ്യമിട്ടുള്ള രണ്ടാമത്തെ ഹൂതി ശ്രമമാണിതെന്നും അദ്ദേഹം പറഞ്ഞു.
എന്നാല് മക്കയെയോ മറ്റ് പുണ്യസ്ഥലങ്ങളെയോ ലക്ഷ്യമിട്ട് ആക്രമണം നടത്തിയെന്ന ആരോപണം ഹൂതികള് നിഷേധിച്ചു. സൗദിയുടെ ആരോപണം തള്ളിയ ഹൂതി വക്താക്കള് മക്കയെ ലക്ഷ്യമിട്ടിട്ടില്ലെന്നാണ് വ്യക്തമാക്കിയത്. സൗദി അറേബ്യയും ഹൂതി സേനയും തമ്മിലുള്ള ഏറ്റുമുട്ടല് ശക്തമാകുന്നതിനിടെയാണ് മക്കയ്ക്ക് സമീപത്തെ ഡ്രോണ് സംഭവം. കഴിഞ്ഞ ദിവസങ്ങളില് സൗദിയുടെ വിവിധ ഭാഗങ്ങള്ക്കെതിരെ ഹൂതി ആക്രമണങ്ങള് നടന്നതായി റിപ്പോര്ട്ടുകളുണ്ട്. ഇതിന് പിന്നാലെ മക്ക ഉള്പ്പെടെയുള്ള മേഖലകളില് സൗദി സുരക്ഷാ മുന്നറിയിപ്പുകളും പുറപ്പെടുവിച്ചിരുന്നു.
