വിശാഖപട്ടണം: തിരുപ്പതി ലഡ്ഡു തയ്യാറാക്കാൻ തിരുമല തിരുപ്പതി ദേവസ്വത്തിന് വിതരണം ചെയ്ത നെയ്യിൽ മായം ചേർത്തുവെന്ന കേസിൽ സുകൃതി ഫുഡ്സ് പ്രമോട്ടർ കൈലാഷ് ചന്ദ് മംഗ്ലയെ എൻഫോഴ്സ്മെന്റ് ഡയറക്ടറേറ്റ് അറസ്റ്റ് ചെയ്തു. പശുവിൻ നെയ്യെന്ന പേരിൽ വിതരണം ചെയ്ത ഉൽപ്പന്നത്തിൽ പാം ഓയിൽ ഉൾപ്പെടെയുള്ള വിവിധ ഘടകങ്ങൾ ചേർത്തിരുന്നതായി അന്വേഷണത്തിൽ കണ്ടെത്തിയെന്ന് ഇഡി വ്യക്തമാക്കി.
സെപ്റ്റംബർ 17ന് കസ്റ്റഡിയിലെടുത്ത മംഗ്ലയെ വിശാഖപട്ടണത്തെ പ്രത്യേക പിഎംഎൽഎ കോടതിയിൽ ഹാജരാക്കി. തുടർന്ന് കോടതി ഇയാളെ ജുഡീഷ്യൽ കസ്റ്റഡിയിൽ വിട്ടതായി ഇഡി അറിയിച്ചു.
പാം ഓയിലും രാസവസ്തുക്കളും ഉപയോഗിച്ചു
അഗ്മാർക്ക് സ്പെഷൽ ഗ്രേഡ് പശുവിൻ നെയ്യ് എന്ന നിലയിലാണ് സുകൃതി ഫുഡ്സ് തിരുമല ദേവസ്വത്തിന് ഉൽപ്പന്നം കൈമാറിയിരുന്നത്. എന്നാൽ യഥാർഥത്തിൽ പാം ഓയിൽ, പാം കേർണൽ ഓയിൽ എന്നിവയ്ക്കൊപ്പം വിവിധ രാസവസ്തുക്കളും ചേർത്താണ് നെയ്യ് തയ്യാറാക്കിയിരുന്നതെന്നാണ് അന്വേഷണ ഏജൻസിയുടെ കണ്ടെത്തൽ.
MG 90, മോണോഗ്ലിസറൈഡ്, മൈവാസറ്റ് സോഫ്റ്റ് 400, അസറ്റിക് ആസിഡ് തുടങ്ങിയ വസ്തുക്കളും കൃത്രിമ നെയ്യ് നിർമിക്കാൻ ഉപയോഗിച്ചിരുന്നതായി ഇഡി പറയുന്നു.
230 കോടിയുടെ ഇടപാട്; 96 കോടി രൂപയുടെ വ്യാജ നെയ്യ്
2019 മുതൽ 2024 വരെയുള്ള കാലയളവിൽ സുകൃതി ഫുഡ്സ് തിരുമല തിരുപ്പതി ദേവസ്വത്തിന് ഏകദേശം 230 കോടി രൂപയുടെ നെയ്യ് വിതരണം ചെയ്തതായി ഇഡി അറിയിച്ചു.
ഇതിൽ ഏകദേശം 96 കോടി രൂപയുടെ മൂല്യമുള്ള നെയ്യ് മായം ചേർത്തതായിരുന്നുവെന്നാണ് അന്വേഷണത്തിലെ കണ്ടെത്തൽ. കേസിലെ ഗൂഢാലോചനയിൽ മംഗ്ലയ്ക്ക് പങ്കുണ്ടെന്നും ഇഡി വ്യക്തമാക്കി. കൃത്രിമ നെയ്യ് നിർമിക്കാൻ ഉപയോഗിച്ച രാസവസ്തുക്കളും മറ്റ് അസംസ്കൃത വസ്തുക്കളും മംഗ്ലയുടെ ഫാക്ടറി പരിസരത്ത് നിന്ന് അന്വേഷണ സംഘം കണ്ടെത്തിയിരുന്നു
മറ്റ് കമ്പനികൾ വഴിയും വിതരണം
ശ്രീ വൈഷ്ണവി ഡയറി സ്പെഷാലിറ്റീസ്, മൽഗംഗ മിൽക്ക് ആൻഡ് അഗ്രോ പ്രൊഡക്ട്സ്, എആർ ഡയറി ഫുഡ്സ് തുടങ്ങിയ കമ്പനികൾ വഴിയും മായം ചേർത്ത നെയ്യ് വിതരണം ചെയ്തിരുന്നു.
തിരുപ്പതി ലഡ്ഡുവിനായി വിതരണം ചെയ്ത നെയ്യിൽ മായം ചേർത്തതുമായി ബന്ധപ്പെട്ട കേസിൽ നേരത്തെയും ഇഡി അറസ്റ്റ് രേഖപ്പെടുത്തിയിരുന്നു. ഭോലെ ബാബ ഓർഗാനിക് ഡയറി മിൽക്കിന്റെ പ്രമോട്ടറും ഡയറക്ടറുമായ വിപിൻ ജയിനെയാണ് അന്വേഷണ ഏജൻസി നേരത്തെ അറസ്റ്റ് ചെയ്തത്. കേസുമായി ബന്ധപ്പെട്ട സാമ്പത്തിക ഇടപാടുകളും കൃത്രിമ നെയ്യ് വിതരണ ശൃംഖലയും കേന്ദ്രീകരിച്ചുള്ള അന്വേഷണം ഇഡി തുടരുകയാണ്.
