തൃശൂര്: നഗരത്തിന് സമീപം കൂര്ക്കഞ്ചേരിയില് അടച്ചിട്ട വീട്ടില് വന് മോഷണം. വീട്ടില് സൂക്ഷിച്ചിരുന്ന 55 പവന് സ്വര്ണം കവര്ന്നു. കൂര്ക്കഞ്ചേരി സ്വദേശി ഹസന് അലിയുടെ വീട്ടിലാണ് മോഷണം നടന്നത്. മകന്റെ ശസ്ത്രക്രിയയുമായി ബന്ധപ്പെട്ട് ഹസന് അലിയും കുടുംബവും ഒരാഴ്ചയായി എറണാകുളത്തായിരുന്നു. തിങ്കളാഴ്ച രാവിലെ വീട്ടില് തിരിച്ചെത്തിയപ്പോഴാണ് മോഷണം നടന്ന വിവരം അറിയുന്നത്. വീടിന്റെ വാതില് തകര്ത്താണ് മോഷ്ടാവ് അകത്തുകടന്നത്.
സംഭവത്തില് തൃശൂര് സിറ്റി പോലീസ് കമ്മീഷണറുടെ സ്ക്വാഡും നെടുപുഴ പോലീസും ചേര്ന്ന് അന്വേഷണം ഊര്ജിതമാക്കി. പുലര്ച്ചെ ഒന്നരയോടെ ഒരാള് വീടിന്റെ മതില് ചാടിക്കടക്കുന്നത് വീട്ടിലെ സി.സി.ടി.വി ക്യാമറയില് പതിഞ്ഞിട്ടുണ്ട്. ഈ ദൃശ്യങ്ങള് കേന്ദ്രീകരിച്ചും അന്വേഷണം പുരോഗമിക്കുകയാണ്. വിരലടയാള വിദഗ്ധരും ഡോഗ് സ്ക്വാഡും സ്ഥലത്തെത്തി പരിശോധന നടത്തി. മോഷ്ടാവിനെ കണ്ടെത്തുന്നതിനായി സമീപപ്രദേശങ്ങളിലെ സി.സി.ടി.വി ദൃശ്യങ്ങളും പോലീസ് പരിശോധിച്ചുവരികയാണ്.
