ന്യൂഡൽഹി: യുവാക്കളെ തീവ്രവാദ ആശയങ്ങളിലേക്ക് ആകർഷിക്കാൻ ഇസ്ലാമിക് സ്റ്റേറ്റ് (ISIS) ചെറുസംഘങ്ങളെ ഉപയോഗിക്കുന്നതായി റിപ്പോർട്ടുകൾ. ഇതിന്റെ പശ്ചാത്തലത്തിൽ ദക്ഷിണേന്ത്യയിലെ വിവിധ സംസ്ഥാനങ്ങളിൽ നടക്കുന്ന ചെറു രഹസ്യയോഗങ്ങൾ കേന്ദ്രീകരിച്ച് രഹസ്യാന്വേഷണ ഏജൻസികൾ നിരീക്ഷണം ശക്തമാക്കിയതായി റിപ്പോർട്ട്.
തമിഴ്നാട്ടിലാണ് ഇത്തരം പ്രവർത്തനങ്ങൾ കൂടുതൽ സജീവമെന്നാണ് സുരക്ഷാ ഉദ്യോഗസ്ഥരെ ഉദ്ധരിച്ചുള്ള വിലയിരുത്തൽ. ഇതേ മാതൃക കർണാടക, കേരളം, തെലങ്കാന, ആന്ധ്രാപ്രദേശ് എന്നിവിടങ്ങളിലേക്കും വ്യാപിപ്പിക്കാൻ ശ്രമിക്കുന്നു എന്ന വിവരവും പുറത്തുവരുന്നുണ്ട്.
ഓൺലൈൻ വഴിയുള്ള തീവ്രവാദ ആശയപ്രചാരണത്തിന് പുറമെ, ഏതാനും പേർ മാത്രം പങ്കെടുക്കുന്ന സ്വകാര്യ യോഗങ്ങളും അന്വേഷണ ഏജൻസികൾ നിരീക്ഷിക്കുന്നുണ്ട്. ചെറിയ സംഘങ്ങളായി യോഗങ്ങൾ സംഘടിപ്പിക്കുന്നത് സുരക്ഷാ ഏജൻസികളുടെ ശ്രദ്ധയിൽപ്പെടാതിരിക്കാനുള്ള ശ്രമമാകാമെന്നാണ് ഉദ്യോഗസ്ഥരുടെ വിലയിരുത്തൽ. അച്ചടിച്ച ലഘുലേഖകളോ പുസ്തകങ്ങളോ വിതരണം ചെയ്യത്തതിനാൽ ഇത്തരം പ്രവർത്തനങ്ങൾ കണ്ടെത്തുന്നതും വെല്ലുവിളിയാണെന്ന് ഉദ്യോഗസ്ഥർ ചൂണ്ടിക്കാട്ടുന്നു. ഇത്തരം ആശയങ്ങളിൽ ആകൃഷ്ടരായ വ്യക്തികൾ ചെങ്കോട്ടയ്ക്ക് സമാനമായി ചാവേറാക്രമണങ്ങൾക്ക് ശ്രമിക്കുന്നതും ആശങ്കയുണ്ടാക്കുന്നുണ്ട്.
തമിഴ്നാട് മാതൃക മറ്റ് സംസ്ഥാനങ്ങളിലേക്കും?
2014 മുതൽ തമിഴ്നാട്ടിൽ ISIS സ്വാധീനം വർധിപ്പിക്കാനുള്ള ശ്രമം ശക്തമാണ്. 2022ലെ കോയമ്പത്തൂർ കാർ ബോംബ് സ്ഫോടനവും ഉദ്യോഗസ്ഥർ പരിശോധിക്കുന്നുണ്ട്. ഒക്ടോബർ 23ന് കോയമ്പത്തൂർ കോട്ടമേട് സംഗമേശ്വര ക്ഷേത്രത്തിന് സമീപം വാഹനത്തിലുണ്ടായിരുന്ന സ്ഫോടകവസ്തു പൊട്ടിത്തെറിച്ച് ജമേഷ് മുബിൻ കൊല്ലപ്പെട്ടിരുന്നു. പിന്നീട് നടന്ന അന്വേഷണത്തിൽ ഇയാൾക്ക് ISIS ആശയങ്ങളുമായി ബന്ധമുണ്ടായിരുന്നുവെന്നും ചില യോഗങ്ങളിൽ പങ്കെടുത്തിരുന്നുവെന്നും ഫണ്ട് ശേഖരണവുമായി ബന്ധപ്പെട്ട പ്രവർത്തനങ്ങളിൽ ഏർപ്പെട്ടിരുന്നുവെന്നും അന്വേഷണ ഏജൻസികൾ കണ്ടെത്തിയിരുന്നു.
