പട്ന: സാമ്പത്തിക പരിമിതികൾ മൂലം മികച്ച പഠനസൗകര്യങ്ങൾ ലഭിക്കാത്ത വിദ്യാർഥികൾക്ക് ഡിജിറ്റൽ വിദ്യാഭ്യാസത്തിന്റെ സഹായം ഉറപ്പാക്കാൻ ബിഹാർ സർക്കാർ ആരംഭിച്ച ‘ബിഹാർ വിദ്യാ സാഥി’ പദ്ധതി ശ്രദ്ധേയമാകുന്നു. പഠനത്തിനിടെ ഉണ്ടാകുന്ന സംശയങ്ങൾക്ക് ഏത് സമയത്തും ലൈവ് അധ്യാപകരുടെ സഹായം തേടാൻ കഴിയുന്നതാണ് പദ്ധതിയുടെ പ്രധാന പ്രത്യേകത.
മുഖ്യമന്ത്രി സമ്രാട് ചൗധരി ഓഗസ്റ്റ് 24നാണ് ‘ബിഹാർ വിദ്യാ സാഥി’ 24×7, വൺ-ടു-വൺ ഇന്ററാക്ടീവ് ലേണിങ് പ്ലാറ്റ്ഫോം ആരംഭിച്ചത്. സംസ്ഥാനത്തെ 700 സരസ്വതി വിദ്യാ നികേതൻ മോഡൽ സ്കൂളുകളിലെ വിദ്യാർഥികൾക്കായാണ് ആദ്യഘട്ടത്തിൽ പദ്ധതി നടപ്പാക്കുന്നത്. തുടർന്ന് മുഴുവൻ വിദ്യാർഥികൾക്കും ഇതിന്റെ പ്രയോജനം ലഭിക്കുമെന്നാണ് സർക്കാർ അറിയിച്ചത്.
പഠനത്തിനിടെ ഏതെങ്കിലും ആശയമോ ചോദ്യമോ മനസിലാകാതെ വന്നാൽ വിദ്യാർഥികൾക്ക് ആപ്പിലൂടെ ഉടൻ അധ്യാപകരുമായി ബന്ധപ്പെടാം. 24 മണിക്കൂറും, ആഴ്ചയിലെ ഏഴ് ദിവസവും ലൈവ് അധ്യാപക സഹായം ലഭ്യമാക്കുന്നതാണ് സംവിധാനത്തിന്റെ പ്രത്യേകത. ഏകദേശം 75,000 അധ്യാപകരുടെ സേവനമാണ് പ്ലാറ്റ്ഫോമിലൂടെ ലഭ്യമാക്കുന്നത്. വിദ്യാർഥികൾക്ക് ആവശ്യാനുസരണം അധ്യാപകരെ തിരഞ്ഞെടുക്കാനും സംശയങ്ങൾ നേരിട്ട് ചോദിക്കാനും കഴിയും.
ക്ലാസ് 9, 10 വിദ്യാർഥികൾക്ക് എല്ലാ വിഷയങ്ങളിലും, 11, 12 ക്ലാസുകളിലെ സയൻസ് വിഭാഗം വിദ്യാർഥികൾക്ക് പ്രത്യേക പഠനസഹായവും പദ്ധതിയിലുണ്ട്. ബോർഡ് പരീക്ഷകൾക്ക് പുറമെ JEE, NEET ഉൾപ്പെടെയുള്ള മത്സരപ്പരീക്ഷകൾക്ക് തയ്യാറെടുക്കാനും ഡിജിറ്റൽ സംവിധാനത്തിലൂടെ സഹായം ലഭ്യമാക്കുകയാണ് ലക്ഷ്യം.
ഗ്രാമീണ മേഖലകളിലെ വിദ്യാർഥികൾക്ക് പ്രത്യേകമായി പ്രയോജനം ലഭിക്കുന്ന തരത്തിലാണ് പദ്ധതി രൂപകൽപ്പന ചെയ്തിരിക്കുന്നത്. സ്വകാര്യ ട്യൂഷനോ വിലകൂടിയ കോച്ചിങ് സംവിധാനങ്ങളോ ആശ്രയിക്കാതെ വീട്ടിലിരുന്ന് പഠനവുമായി ബന്ധപ്പെട്ട സംശയങ്ങൾ പരിഹരിക്കാനുള്ള അവസരമാണ് ഇതിലൂടെ ലഭിക്കുന്നത്.
‘ബിഹാർ വിദ്യാ സാഥി’ പദ്ധതിയുടെ ഔദ്യോഗിക ആപ്പ് പങ്കാളി Filo ആണ്. ലൈവ് 1:1 അധ്യാപക സഹായത്തിന് പുറമെ AI അടിസ്ഥാനമാക്കിയ പഠനസഹായവും ഡിജിറ്റൽ പഠനസാമഗ്രികളും പ്ലാറ്റ്ഫോമിൽ ലഭ്യമാക്കുന്നുണ്ട്.
പഠനസൗകര്യങ്ങളിലെ നഗര-ഗ്രാമ വ്യത്യാസം കുറയ്ക്കുകയും സാമ്പത്തിക സാഹചര്യങ്ങൾ പഠനത്തിന് തടസമാകാതിരിക്കുകയും ചെയ്യുക എന്ന ലക്ഷ്യത്തോടെയാണ് പദ്ധതിയെന്ന് ബിഹാർ സർക്കാർ വ്യക്തമാക്കുന്നു. വിദ്യാഭ്യാസരംഗത്തെ ഡിജിറ്റൽ ഇടപെടലുകൾ കൂടുതൽ ശക്തമാക്കുന്നതിന്റെ ഭാഗമായാണ് ‘വിദ്യാ സാഥി’യെ സർക്കാർ അവതരിപ്പിച്ചിരിക്കുന്നത്.
