തിരുവനന്തപുരം: വള്ളിക്കുന്നിലും ഒറ്റപ്പാലത്തും രണ്ട് ട്രെയിനുകൾക്ക് സ്റ്റോപ്പ് അനുവദിച്ചതായി രാജീവ് ചന്ദ്രശേഖർ. യാത്രക്കാരുടെ ദീർഘകാല ആവശ്യം പരിഗണിച്ച് കേന്ദ്ര റെയിൽവേ മന്ത്രി അശ്വിനി വൈഷ്ണവിന് നൽകിയ അപേക്ഷയെ തുടർന്നാണ് റെയിൽവേ മന്ത്രാലയം സ്റ്റോപ്പുകൾ അനുവദിച്ചതെന്ന് രാജീവ് ചന്ദ്രശേഖർ അറിയിച്ചു.
വള്ളിക്കുന്നിലെയും ഒറ്റപ്പാലത്തെയും യാത്രക്കാർക്ക് ഏറെ പ്രയോജനപ്പെടുന്ന തീരുമാനമാണിതെന്ന് രാജീവ് ചന്ദ്രശേഖർ പറഞ്ഞു. ദീർഘകാലമായി യാത്രക്കാർ ഉന്നയിച്ചിരുന്ന ആവശ്യത്തിന് പരിഹാരം കാണാൻ ഇടപെട്ട കേന്ദ്ര റെയിൽവേ മന്ത്രി അശ്വിനി വൈഷ്ണവിനും റെയിൽവേ മന്ത്രാലയത്തിനും അദ്ദേഹം നന്ദി അറിയിച്ചു.
2025 നവംബർ നാലിനും 2026 ജൂൺ 16നും കേന്ദ്ര റെയിൽവേ മന്ത്രിക്ക് രാജീവ് ചന്ദ്രശേഖർ കത്തുകൾ നൽകിയിരുന്നു. ഈ കത്തുകളെ തുടർന്നാണ് റെയിൽവേ മന്ത്രാലയം സ്റ്റോപ്പ് അനുവദിച്ചതെന്നാണ് അദ്ദേഹത്തിന്റെ ഓഫീസ് അറിയിച്ചത്. സ്റ്റോപ്പുകൾ അനുവദിച്ച വിവരം അശ്വിനി വൈഷ്ണവ് രാജീവ് ചന്ദ്രശേഖറിന് അയച്ച കത്തിലൂടെയാണ് അറിയിച്ചതെന്നും റിപ്പോർട്ടിൽ പറയുന്നു.
16307 ആലപ്പുഴ–കണ്ണൂർ എക്സ്പ്രസിന് വള്ളിക്കുന്ന് സ്റ്റേഷനിലാണ് സ്റ്റോപ്പ് അനുവദിച്ചത്.
16377/16378 കെഎസ്ആർ ബെംഗളൂരു–എറണാകുളം ജംഗ്ഷൻ എക്സ്പ്രസിന് ഒറ്റപ്പാലം സ്റ്റേഷനിലും സ്റ്റോപ്പ് അനുവദിച്ചിട്ടുണ്ട്.
രണ്ട് സ്റ്റോപ്പുകളും പ്രാദേശിക യാത്രക്കാർക്ക് വിവിധ ആവശ്യങ്ങൾക്കായി കൂടുതൽ സൗകര്യം നൽകുമെന്നാണ് രാജീവ് ചന്ദ്രശേഖർ വ്യക്തമാക്കിയത്. വള്ളിക്കുന്ന്, ഒറ്റപ്പാലം മേഖലകളിൽനിന്ന് ജോലി, വിദ്യാഭ്യാസം, ചികിത്സ, മറ്റ് ആവശ്യങ്ങൾക്കായി ട്രെയിൻ യാത്രയെ ആശ്രയിക്കുന്നവർക്ക് പുതിയ സ്റ്റോപ്പുകൾ പ്രയോജനപ്പെടുമെന്നാണ് വിലയിരുത്തൽ.
കേരളത്തിലെ റെയിൽ യാത്രക്കാരുടെ സൗകര്യം മെച്ചപ്പെടുത്തുന്നതിനും വിവിധ പ്രദേശങ്ങളുടെ കണക്റ്റിവിറ്റി വർധിപ്പിക്കുന്നതിനുമായി ആവശ്യമായ വിഷയങ്ങൾ കേന്ദ്ര സർക്കാരിന്റെ ശ്രദ്ധയിൽ തുടർന്നും കൊണ്ടുവരുമെന്നും രാജീവ് ചന്ദ്രശേഖർ പറഞ്ഞു.
