കൊല്‍ക്കത്ത: പശ്ചിമ ബംഗാള്‍ നിയമസഭയില്‍ വിശ്വാസവോട്ടെടുപ്പ് നടന്നാല്‍ ബിജെപിക്ക് 275 എംഎല്‍എമാരുടെ പിന്തുണ ലഭിക്കുമെന്ന് മുഖ്യമന്ത്രി സുവേന്ദു അധികാരി. ടിഎംസി ടിക്കറ്റില്‍ വിജയിച്ച 64 എംഎല്‍എമാര്‍ കൂടി ബിജെപിയെ പിന്തുണയ്‌ക്കുമെന്ന് അദ്ദേഹം പറഞ്ഞു. 294 അംഗ നിയമസഭയില്‍ ബിജെപിക്ക് വലിയ ഭൂരിപക്ഷമുണ്ടാകുമെന്ന സൂചനയാണ് സുവേന്ദുവിന്റെ പ്രസ്താവന. സോഷ്യല്‍ മീഡിയയുടെയോ ടെലിവിഷന്‍ ചര്‍ച്ചകളുടെയോ സ്വാധീനത്തിലല്ല ബിജെപി തിരഞ്ഞെടുപ്പില്‍ വിജയിച്ചതെന്നും അദ്ദേഹം വ്യക്തമാക്കി. ഭവാനിപുരില്‍ മുന്‍ മുഖ്യമന്ത്രി മമത ബാനര്‍ജിയെ പരാജയപ്പെടുത്തിയതും ബിജെപി നേതാവ് സജല്‍ ഘോഷ് വിജയിച്ചതും സമൂഹമാധ്യമങ്ങളുടെ പ്രചാരണം കൊണ്ടല്ലെന്നും ജനങ്ങളുടെ പിന്തുണയിലൂടെയാണെന്നും സുവേന്ദു അധികാരി പറഞ്ഞു.
Don’t miss the latest breaking news and updates! Subscribe to Janam TV’s WhatsApp channel now…
https://whatsapp.com/channel/0029Va4LMqWE50UdrVhraq0y
ജനങ്ങള്‍ തിരഞ്ഞെടുത്ത സനാതന സര്‍ക്കാരാണ് ബംഗാളില്‍ അധികാരത്തിലുള്ളതെന്നും അദ്ദേഹം വ്യക്തമാക്കി. കഴിഞ്ഞ 49 വര്‍ഷത്തെ ഇടത്-ടിഎംസി ഭരണകാലത്ത് സംസ്ഥാനത്ത് അടിഞ്ഞുകൂടിയ പ്രശ്‌നങ്ങള്‍ പരിഹരിക്കാനാണ് കഴിഞ്ഞ ആറു മാസമായി സര്‍ക്കാര്‍ ശ്രമിക്കുന്നതെന്നും സുവേന്ദു വിമര്‍ശിച്ചു. മമത ബാനര്‍ജിക്ക് പാര്‍ട്ടി ചിഹ്നം നഷ്ടപ്പെടുന്ന സാഹചര്യമുണ്ടാകുമെന്നും അദ്ദേഹം പറഞ്ഞു. ഈ വര്‍ഷം ഏപ്രിലില്‍ നടന്ന നിയമസഭാ തിരഞ്ഞെടുപ്പില്‍ 208 സീറ്റുകള്‍ നേടിയാണ് ബിജെപി പശ്ചിമ ബംഗാളില്‍ അധികാരത്തിലെത്തിയത്. ഇതോടെ 15 വര്‍ഷം നീണ്ട ടിഎംസി ഭരണം അവസാനിച്ചു. 2011ല്‍ ഇടതുമുന്നണിയുടെ 34 വര്‍ഷത്തെ ഭരണത്തിന് വിരാമമിട്ട ടിഎംസിക്ക് ഇത്തവണ 80 സീറ്റുകളാണ് ലഭിച്ചത്.
