ഇന്ന് ലോക ഭിന്നശേഷി ദിനം. നമ്മുടെ ഭാവിക്കായി 17 ലക്ഷ്യങ്ങൾ എന്ന ആശയം മുൻനിർത്തിയാണ് ഈ വർഷം ഐക്യരാഷ്‌ട്രസഭ ലോക ഭിന്നശേഷി ദിനം ആചരിക്കുന്നത്.
ശരീരം തളർത്താത്ത മനസുമായി ജീവിക്കുന്നവരെ ഓർക്കാൻ ഒരു ദിനം. 1992 ഒക്ടോബറിലാണ് ഐക്യരാഷ്‌ട്രസഭ ഈ ദിനം ഭിന്നശേഷിക്കാരുടെ ദിനമായി പ്രഖ്യാപിച്ചത്. ദേശീയ, അന്തർദേശീയ തലങ്ങളിൽ ഭിന്നശേഷിക്കാരുടെ അവകാശങ്ങളെ കുറിച്ച് ബോധവൽകരണം നടത്തുകയാണ് ദിനാചരണത്തിന്‍റെ ലക്ഷ്യം. ചെറിയ ചെറിയ വൈകല്യങ്ങൾക്കപ്പുറം ഇവരിലെ കഴിവുകളെ കണ്ടെത്തുകയും വളർത്തുകയും നമ്മുടെ ചുമതലയാണെന്ന് ഓർമ്മിപ്പിക്കുക കൂടിയാണ് ഈ ദിനം.
രാഷ്‌ട്രീയ, സാമൂഹ്യ, സാമ്പത്തിക, സാംസ്കാരിക രംഗങ്ങളിൽ ഉണ്ടാകേണ്ട നേട്ടങ്ങളെക്കുറിച്ച് അവരിൽ അവബോധമുണ്ടാക്കുവാനും യുഎന്നിന്‍റെ ഭിന്നശേഷിദിനാശയങ്ങൾ ലക്ഷ്യമിടുന്നു. ഭിന്നശേഷിദിനാചരണങ്ങളും ബോധവൽക്കരണവും പതിവായി നടക്കുന്നുണ്ടെങ്കിലും ശാരീരികവും മാനസികവുമായ പരിമിതികൾ മൂലം സമൂഹത്തിൽ ഇന്നും അവഗണന അനുഭവിക്കുന്നവരാണിവർ.
അംഗപരിമിതരെ സമൂഹത്തിന്‍റെ മുഖ്യധാരയിൽ എത്തിക്കുന്നതിനായി നിരവധി പദ്ധതികൾ ലോകരാജ്യങ്ങൾ മുന്നോട്ട്‍വെക്കുന്നുണ്ട്. ഇത്തരം പദ്ധതികളുടെ സേവനം അവരിലേക്ക് എത്തിച്ചുകൊടുക്കുന്നതിനും ആവശ്യമായ പിന്തുണ നൽകുന്നതിനും സമൂഹം മുന്നോട്ട് വരണം. ഈ ദിനത്തിൽ നമുക്ക് പ്രതിജ്ഞ ചെയ്യാം ഒരു കൈത്തങ്ങായി നമ്മളും കൂടെയുണ്ട്.
