മോസ്കോ: ഈ ലോകകപ്പിൽ പ്രീ ക്വാർട്ടർ ഉറപ്പിക്കുന്ന ആദ്യ ടീമുകളായി ഉറുഗ്വായും ആതിഥേയരായ റഷ്യയും. ഇന്ന് നടന്ന ഗ്രൂപ്പ് എ മത്സരത്തിൽ സൗദി അറേബ്യയെ മറുപടിയില്ലാത്ത ഒരു ഗോളിന് തോൽപ്പിച്ചാണ് ഉറുഗ്വായ് പ്രീക്വാർട്ടർ ഉറപ്പിച്ചത്. നൂറാം അന്താരാഷ്ട്ര മത്സരത്തിനിറങ്ങിയ ലൂയി സുവാരസ് നേടിയ ഗോളിനാണ് ഉറുഗ്വായ് ജയം സ്വന്തമാക്കിയത്.
23-ാം മിനിറ്റിൽ കാർലോസ് സാഞ്ചസിന്റെ കോർണറിൽ നിന്നായിരുന്നു സുവാരസിന്റെ ക്ളിനിക്കൽ ഫിനിഷ്. ഇതോടെ മൂന്ന് ലോകകപ്പുകളിൽ ഗോൾ നേടുന്ന ആദ്യ ഉറുഗ്വായ് താരവുമായി സുവാരസ്. ശക്തമായ ആക്രമണങ്ങൾ നടത്തി അവസാനം വരെ പൊരുതിയശേഷമായിരുന്നു സൗദിയുടെ തോൽവി.
രണ്ട് മത്സരങ്ങളും തോറ്റ സൗദി പുറത്തായി. കളിച്ച രണ്ട് മത്സരവും ജയിച്ച റഷ്യയും പ്രീക്വാർട്ടറിൽ പ്രവേശിച്ചു. ഈ മാസം 25ന് റഷ്യയും ഉറുഗ്വായും തമ്മിലുള്ള മത്സരത്തിലൂടെ ഗ്രൂപ്പ് ചാമ്പ്യൻമാരെ അറിയാം. രണ്ട് മത്സരങ്ങളും തോറ്റതിനാൽ ഈ മാസം 25ന് നടക്കുന്ന സൗദി-ഈജിപ്റ്റ് മത്സരഫലം അപ്രസക്തമായി.