ലോകകപ്പില് ശ്രീലങ്ക-ന്യൂസിലന്ഡ് മത്സരം ഏകപക്ഷീയമായിരുന്നെങ്കിലും 2 റെക്കോര്ഡുകളാണ് ഇന്നലെ കാര്ഡിഫില് പിറന്നത്. ആദ്യ മത്സരത്തില് ന്യൂസിലന്ഡിനു മുന്നില് ശ്രീലങ്ക തകര്ന്നടിഞ്ഞപ്പോള് കീവീസ് സ്വന്തമാക്കിയത് ലോകകപ്പ് ചരിത്രത്തില് മൂന്നു തവണ 10 വിക്കറ്റിന് ജയിക്കുന്ന ആദ്യ ടീമെന്ന റെക്കോര്ഡ്. മറുഭാഗത്ത് പരാജയപ്പെട്ടെങ്കിലും ലങ്കന് നായകന് ദിമുത് കരുണരത്നെ പൊരുതി നേടിയതാകട്ടെ അപൂര്വ്വമായ മറ്റൊരു റെക്കോര്ഡ്.
ശ്രീലങ്കന് ഇന്നിംഗ്സ് 29.2 ഓവറില് വെറും 136 റണ്സില് അവസാനിച്ചപ്പോഴും ഓപ്പണറായി ക്രീസിലെത്തിയ കരുണരത്നെ പുറത്താകാതെ നിന്നു. 84 പന്തുകള് നേരിട്ട അദ്ദേഹം സ്വന്തമാക്കിയത് 52 റണ്സ്. ലോകകപ്പ് ക്രിക്കറ്റിന്റെ ചരിത്രത്തില് ഇതു രണ്ടാം തവണയാണ് ഒരു ഓപ്പണിംഗ് ബാറ്റ്സ്മാന് പുറത്താകാതെ ഇന്നിംഗ്സ് അവസാനിപ്പിക്കുന്നത്.
1999-ല് ഇംഗ്ലണ്ടില് നടന്ന ലോകകപ്പില് തന്നെയാണ് ആദ്യ റെക്കോര്ഡും പിറന്നത്. അന്ന് ഓസ്ട്രേലിയയുമായി നടന്ന മത്സരത്തില് ഓപ്പണറായെത്തി 142 പന്തുകള് നേരിട്ട് 49 റണ്സോടെ പുറത്താകാതെ നിന്ന വെസ്റ്റ് ഇന്ഡീസ് വിക്കറ്റ് കീപ്പര് റിഡ്ലി ജേക്കബ്സാണ് ഈ നേട്ടത്തിലെത്തിയ ആദ്യ താരം.
