സതാംപ്ടണ്‍: ഇനി നീല ജഴ്‌സിക്കു പുറമേ മറ്റൊരു നിറത്തില്‍ ഇന്ത്യന്‍ ടീമിനെ കാണാം. ലോകകപ്പ് ക്രിക്കറ്റില്‍ ഇനി ‘മെന്‍ ഇന്‍ ബ്ലൂ’ ഓറഞ്ച് ജഴ്‌സിയണിയും. ഒരേ നിറത്തിലുളള ജഴ്‌സികള്‍ ഒന്നിലധികം ടീമുകള്‍ ഉപയോഗിക്കുന്നതിനാലാണ് രണ്ടാമതൊരു ജഴ്‌സി എന്ന നിബന്ധന ഐസിസി മുന്നോട്ടു വെച്ചത്. ഇന്ത്യ ഉള്‍പ്പെടെ 5 രാജ്യങ്ങള്‍ക്കാണ് ഈ നിബന്ധന ബാധകമായിട്ടുള്ളത്.
ടൂര്‍ണമെന്റില്‍ നീലയും പച്ചയും നിറത്തിലുള്ള ജഴ്‌സികളാണ് കൂടുതലുള്ളത്. മറ്റു ടീമുകളെല്ലാം തങ്ങളുടെ രണ്ടാം ജഴ്‌സി പുറത്തുവിട്ടെങ്കിലും ഇന്ത്യയുടെ ജഴ്‌സിയുടെ നിറമറിയാന്‍ ആരാധകര്‍ ആകാംക്ഷയോടെ കാത്തിരിക്കുകയായിരുന്നു. എന്നാല്‍ ആ കാത്തിരിപ്പിനു വിരാമമിട്ടുകൊണ്ടാണ് ഇന്ത്യന്‍ ടീം ഓറഞ്ച് നിറത്തിലുളള ജഴ്‌സി തെരഞ്ഞെടുത്തിരിക്കുന്നത്.
ബിസിസിഐയുടെ മാര്‍ക്കറ്റിംഗ് ടീം രണ്ടാം ജഴ്‌സിയുടെ രൂപകല്‍പ്പന ചെയ്തുകൊണ്ടിരിക്കുകയാണ്. വൈകാതെ തന്നെ ജഴ്‌സി പ്രദര്‍ശിപ്പിക്കുമെന്നാണ് ലഭിക്കുന്ന വിവരം. ഇംഗ്ലണ്ടും ഇന്ത്യയും ഒഴികെ നീല ജഴ്‌സി ധരിക്കുന്ന ടീമുകളായ അഫ്ഗാനിസ്ഥാന്‍, ശ്രീലങ്ക എന്നിവരും പച്ച നിറത്തിലുള്ള ജഴ്‌സി ധരിക്കുന്ന പാകിസ്ഥാന്‍, ദക്ഷിണാഫ്രിക്ക, ബംഗ്ലാദേശ് എന്നീ ടീമുകളും രണ്ടാം ജഴ്‌സി പുറത്തിറക്കിയിരുന്നു.
ജൂണ്‍ 30-ന് എഡ്ജ്ബാസ്റ്റണില്‍ ഇംഗ്ലണ്ടിനെതിരെ ഇറങ്ങുമ്പോള്‍ പുതിയ ജഴ്‌സിയാകും ഇന്ത്യന്‍ ടീം ധരിക്കുക. ഐസിസി നിയമപ്രകാരം ആതിഥേയ രാജ്യത്തിന് ജഴ്‌സി മാറ്റേണ്ടതില്ല.
