Tech

പൊട്ടിത്തെറിക്കാതെ, തിളച്ച് മറിയാതെ ശാന്തനായി സൂര്യൻ; ആശങ്കയിൽ ശാസ്ത്ര ലോകം

കഴിഞ്ഞ 16 ദിവസങ്ങളായി സൂര്യന്‍ ശാന്തമായാണ് നിലകൊള്ളുന്നത്. എന്നാല്‍ സൂര്യന്റെ ഈ ശാന്തത ഭയത്തോടെ ഉറ്റുനോക്കുകയാണ് ശാസ്ത്ര ലോകം.

സാധാരണയായി തിളച്ചുമറിഞ്ഞും പൊട്ടിത്തെറിച്ചുമൊക്കെയാണ് സൂര്യപ്രതലം കാണപ്പെടുന്നത്. ഇങ്ങനെ തിളച്ചുമറിയുമ്പോള്‍ സൂര്യപ്രതലത്തില്‍ പാടുകളും പൊട്ടുകളുമെക്കെ പ്രത്യക്ഷപ്പെടും. എന്നാല്‍ കഴിഞ്ഞ കുറച്ച് ദിവസങ്ങളായി സൂര്യ മുഖത്ത് ഇത്തരം പാടുകളോ പൊട്ടുകളോ ഒന്നുംതന്നെ ദൃശ്യമാകുന്നില്ല.

ഇത്തരത്തില്‍ പൊട്ടോ പൊടിയോ ഇല്ലാത്ത സൂര്യ പ്രതലത്തില്‍ നിന്നും കാന്തിക തരംഗങ്ങള്‍ ഉണ്ടാകാമെന്നാണ് ശാസ്ത്രലോകത്തിന്റെ വിലയിരുത്തല്‍. സൂര്യന്റെ പ്രതലത്തില്‍ നിന്നുള്ള കാന്തിക തരംഗങ്ങള്‍ സാറ്റ്‌ലൈറ്റുകളേയും വ്യോമഗതാഗതത്തേയും പ്രതികൂലമായി ബാധിക്കുമെന്നാണ് നാസയിലെ ശാസ്ത്രജ്ഞന്മാര്‍ പറയുന്നത്.

11 വര്‍ഷങ്ങള്‍ കൂടുമ്പോള്‍ സംഭവിക്കുന്ന സോളാര്‍ മിനിമം എന്ന പ്രതിഭാസത്തിന്റെ ഫലമായാണ് സൂര്യോപരിതലത്തില്‍ ഇത്തരമൊരു മാറ്റമുണ്ടായത്. ഭൂമിയിലെ ജീവന് ഇത് നേരിട്ട് ഭീഷണിയാവില്ലായെന്നാണ് ഇപ്പോഴത്തെ വിലയിരുത്തല്‍. എന്നാല്‍ ഉപഗ്രഹങ്ങളേയും ബഹിരാകാശ സഞ്ചാരികളേയും സോളാര്‍ മിനിമം പ്രതികൂലമായി ബാധിക്കാനിടയുണ്ട്.

സോളാര്‍ മിനിമം എന്ന പ്രതിഭാസത്തിന്റെ കാലം അവസാനിച്ചാല്‍ വീണ്ടും സൂര്യന്റെ പ്രതലം തിളച്ചു മറിയാന്‍ തുടങ്ങും. അപ്പോള്‍ സൂര്യ മുഖത്ത് വീണ്ടും പാടുകള്‍ പ്രത്യക്ഷപ്പെടും. ഇത്തരം പ്രതിഭാസം മൂലം കാലാവസ്ഥാ വ്യതിയാനവും സംഭവിക്കാന്‍ സാധ്യതയുണ്ട്.

ചിലപ്പോള്‍ ഇത്തരം പ്രതിഭാസങ്ങള്‍ വര്‍ഷങ്ങളോളം നീണ്ടു നില്‍ക്കാറുണ്ട്. 1650 മുതല്‍ 1710 വരെ സോളാര്‍ പ്രതിഭാസം രേഖപ്പെടുത്തിയിരുന്നു. ഇക്കാലത്ത് ഭൂമിയില്‍ അതി ശൈത്യമായിരുന്നു. ലിറ്റില്‍ ഐസ് ഏജ് എന്നും മോണ്‍ഡര്‍ മിനിമം എന്നുമായിരുന്നു ഈ കാലഘട്ടം വിശേഷിപ്പിക്കപ്പെട്ടിരുന്നത്.

സോളാര്‍ മിനിമം എന്ന പ്രതിഭാസത്തിന് വിഭിന്നമായി സോളാര്‍ മാക്‌സിമം എന്ന മറ്റൊരു പ്രതിഭാസവും ഉണ്ട്. സോളാര്‍ മാക്‌സിമം പ്രതിഭാസത്തില്‍ സൂര്യന്റെ ഉപരിതലത്തില്‍ വലിയ പൊട്ടുകളാവും കാണാന്‍ കഴിയുന്നത്.

5K Shares

Scroll down for comments

Post Your Comments

വാര്‍ത്തകളോടു പ്രതികരിക്കുന്നവര്‍ അശ്ലീലവും അസഭ്യവും നിയമവിരുദ്ധവും അപകീര്‍ത്തികരവും സ്പര്‍ദ്ധ വളര്‍ത്തുന്നതുമായ പരാമര്‍ശങ്ങള്‍ ഒഴിവാക്കുക. വ്യക്തിപരമായ അധിക്ഷേപങ്ങള്‍ പാടില്ല. ഇത്തരം അഭിപ്രായങ്ങള്‍ സൈബര്‍ നിയമപ്രകാരം ശിക്ഷാര്‍ഹമാണ്. വായനക്കാരുടെ അഭിപ്രായങ്ങള്‍ വായനക്കാരുടേതു മാത്രമാണ്, ജനംടിവിയുടേതല്ല. ദയവായി മലയാളത്തിലോ ഇംഗ്ലീഷിലോ മാത്രം അഭിപ്രായം എഴുതുക. മംഗ്ലീഷ് ഒഴിവാക്കുക.

Back to top button
Close