ന്യൂഡൽഹി: പണിമുടക്കി സാമൂഹിക മാദ്ധ്യമങ്ങൾ. ഫേസ്ബുക്ക്, വാട്ട്സ് ആപ്പ്, ഇൻസ്റ്റഗ്രാം തുടങ്ങിയ സാമൂഹിക മാദ്ധ്യമങ്ങളാണ് ബുധനാഴ്ച വൈകുന്നേരത്തോടെ പ്രവർത്തനം നിലച്ചത്.
ഫേസ്ബുക്കിലും ഇൻസ്റ്റഗ്രാമിലും ഫോട്ടോകളും വീഡിയോകളും കാണാനാകുന്നില്ല എന്നതായിരുന്നു പ്രധാന പ്രശ്നം. ഏറ്റവുമധികം ആളുകൾ മെസ്സെൻജിംഗിനായി ഉപയോഗിക്കുന്ന വാട്ട്സ് ആപ്പിൽ അറ്റാച്ച്മെന്റുകൾ ഡൗൺലോഡ് ചെയ്യാൻ സാധിച്ചിരുന്നില്ല.
അറ്റാച്ച്മെന്റുകൾ ഡൗൺലോഡ് ചെയ്യാൻ ശ്രമിക്കുമ്പോൾ ഇത് ഇപ്പോൾ ഡൗൺലോഡ് ചെയ്യാൻ സാധിക്കില്ലെന്നും ദയവായി പിന്നീട് ശ്രമിക്കുക എന്ന മെസേജാണ് ലഭിക്കുക. ഇപ്പോഴും പ്രശ്നം പൂർണമായും പരിഹരിക്കാൻ സാധിച്ചിട്ടില്ല.
ഈ മൂന്ന് സാമൂഹിക മാദ്ധ്യമങ്ങളും ഫേസ്ബുക്കിന്റെ ഉടമസ്ഥതയിലാണുള്ളത്. പ്രശ്ന കാരണം സംബന്ധിച്ച് ഫേസ്ബുക്കിന്റെ ഔദ്യോഗിക പ്രതികരണം ഇതുവരെ ലഭ്യമായിട്ടില്ല.
ഇതാദ്യമായല്ല ഇവ മൂന്നും ഒരേ സമയം പ്രവർത്തന രഹിതമാകുന്നത്. ഇക്കഴിഞ്ഞ മാർച്ചിലും ഫേസ്ബുക്കും ഇൻസ്റ്റഗ്രാമും വാട്ട്സ് ആപ്പും ഒരുമിച്ച് പണിമുടക്കിയിരുന്നു. സെർവർ തകരാറാണ് പ്രശ്നത്തിന് കാരണമെന്നായിരുന്നു അന്ന് ഫേസ്ബുക്കിന്റെ ഔദ്യോഗിക വിശദീകരണം.