ലോര്‍ഡ്‌സ്: ലോകകപ്പ് ക്രിക്കറ്റില്‍ സെമി ഫൈനല്‍ കാണാതെ പാകിസ്ഥാന് പുറത്ത്. ബംഗ്ലാദേശിനെ 94 റണ്‍സിനു തകര്‍ത്തെങ്കിലും ടൂര്‍ണമെന്റില്‍ നിന്നും പാകിസ്ഥാന് പുറത്തായി. ഇതോടെ ന്യൂസിലാന്‍ഡ് സെമി ബര്‍ത്ത് ഉറപ്പിച്ചു. ഈ മത്സരത്തോടെ ഷുഐബ് മാലിക് രാജ്യാന്തര മത്സരങ്ങളില്‍ നിന്നും വിരമിച്ചു.
നിരവധി പ്രത്യേകതകള്‍ നിറഞ്ഞു നിന്ന മത്സരമായിരുന്നു പാകിസ്ഥാന്-ബംഗ്ലാദേശ് പോരാട്ടം. ടോസ് നേടി ആദ്യം ബാറ്റ് ചെയ്ത പാകിസ്ഥാന് നിശ്ചിത 50 ഓവറില്‍ 9 വിക്കറ്റ് നഷ്ടത്തില്‍ 315 റണ്‍സ് നേടി. ഫഖര്‍ സല്‍മാന്‍ 13 റണ്‍സ് നേടി പുറത്തായങ്കിലും മൂന്നാം വിക്കറ്റില്‍ ഒരുമിച്ച ഇമാം-ബാബര്‍ അസം കൂട്ടുകെട്ടാണ് പാകിസ്ഥാന് മികച്ച സ്‌കോര്‍ സമ്മാനിച്ചതില്‍ നിര്‍ണ്ണായകമായത്. ഇമാം സെഞ്ച്വറി (100) നേടിയപ്പോള്‍ ബാബര്‍ സെഞ്ച്വറിക്ക് നാല് റണ്‍സ് അരികെ പുറത്തായി. 27 റണ്‍സ് നേടിയ ഹഫീസിനും 26 പന്തില്‍ നിന്ന് 43 റണ്‍സ് നേടിയ ഇമദ് വസീമിനും ഒഴികെ പാക് നിരയില്‍ മറ്റാര്‍ക്കും കാര്യമായ സംഭാവന ചെയ്യാന്‍ കഴിഞ്ഞില്ല.
ബംഗ്ലാദേശിനു വേണ്ടി മുസ്താഫിസുര്‍ റഹ്മാന്‍ 10 ഓവറില്‍ 75 റണ്‍സ് വഴങ്ങി 5 വിക്കറ്റ് വീഴ്‌ത്തി. മൊഹമ്മദ് സൈഫുദ്ദീന്‍ 3 വിക്കറ്റ് വീഴ്‌ത്തിയപ്പോള്‍ മെഹിദി ഹസന്‍ 1 വിക്കറ്റ് സ്വന്തമാക്കി.
മറുപടി ബാറ്റിംഗില്‍ 48 റണ്‍സ് നേടിയപ്പോഴേക്കും ബംഗ്ലാദേശിന്റെ ഓപ്പണര്‍മാരായ തമീം ഇഖ്ബാലും(8) സൗമ്യ സര്‍ക്കാരും(22) പുറത്തായി. മികച്ച ഫോമിലുള്ള ഷക്കീബ് അല്‍ഹസന്‍ അര്‍ദ്ധ സഞ്ച്വറി(64) നേടി. ഇതോടെ ഷക്കിബ് ഒരു ലോകകപ്പില്‍ ഏറ്റവും കൂടുതല്‍ അര്‍ദ്ധ സെഞ്ച്വറികളെന്ന സച്ചിന്റെ റെക്കോര്‍ഡിനൊപ്പമെത്തി. ഈ ലോകകപ്പില്‍ 600 റണ്‍സ് പിന്നിടുന്ന ആദ്യ താരവുമായി ഷക്കിബ്. 44.1 ഓവറില്‍ ബംഗ്ലാദേശ് 221 റണ്‍സിനു എല്ലാവരും പുറത്തായി.
പാകിസ്ഥാനു വേണ്ടി 9.1 ഓവറില്‍ 35 റണ്‍സ് വഴങ്ങിയ ഷഹീന്‍ അഫ്രീദി 6 വിക്കറ്റ് സ്വന്തമാക്കി. ഷദബ് ഖാന്‍ 2 വിക്കറ്റ് നേടിയപ്പോള്‍ വഹാബ് റിയാസും മുഹമ്മദ് ആമിറും ഓരോ വിക്കറ്റ് വീഴ്‌ത്തി. ഷഹീന്‍ അഫ്രീദിയാണ് കളിയിലെ കേമന്‍.
