തിരുവനന്തപുരം: അപ്രധാന കായിക ഇനങ്ങളിലെ പങ്കാളിത്ത സര്ട്ടിഫിക്കറ്റുകളുടെ ബലത്തില് കേരളത്തില് സ്പോര്ട്സ് ക്വോട്ട പ്രവേശനങ്ങളില് വ്യാപക ക്രമക്കേടുകള് നടക്കുന്നതായി കണ്ടെത്തല്.
ഇന്റര് യൂണിവേഴ്സിറ്റി സ്പോര്ട്സ് ബോര്ഡ് അംഗീകരിച്ച കായിക ഇനങ്ങളിലെ മെഡല് ജേതാക്കള്ക്കെല്ലാം സ്പോര്ട്സ് ക്വോട്ട പ്രവേശനത്തിനു അനുമതി നല്കുന്ന നിയമമാണ് ഇതിനു കാരണമായി ചൂണ്ടിക്കാണിക്കപ്പെടുന്നത്.
വള്ളിച്ചാട്ടം എന്നു വിളിക്കുന്ന റോപ് സ്കിപ്പിങ്, ചീട്ടുകളിയുടെ മറ്റൊരു പതിപ്പായ ബ്രിജ്, ഫിന്ലന്ഡിന്റെ കായിക ഇനമായ പെസപ്പല്ലോ തുടങ്ങിയ ഇനങ്ങളില് പങ്കെടുത്തവര്ക്കു പോലും അഡ്മിഷന് കിട്ടുന്ന സാഹചര്യമാണു നിലവില്.
മല്സര ഇനങ്ങളുടെ പ്രചാരം കണക്കുകൂട്ടാത്തതും അത്ലറ്റിക്സിനും കിക്ക് ബോക്സിങ് പോലുള്ള മല്സര ഇനങ്ങള്ക്കു ഒരേ വെയിറ്റേജ് നല്കുന്നതുമായ നിയമങ്ങളാണു ഇത്തരം ക്രമക്കേടുകളുടെ വ്യാപനത്തിനു വഴിയൊരുക്കുന്നത്.
അതേസമയം നാട്ടില് പ്രചാരത്തിലില്ലാത്ത കായിക ഇനങ്ങളുടെ പേരില് ഉത്തരേന്ത്യയില് രൂപീകരിച്ച ചില സംഘടനകള്ക്ക് അസോസിയേഷന് ഓഫ് ഇന്ത്യന് യൂണിവേഴ്സ്റ്റിസ് അംഗീകാരം നല്കിയതോടെ ഇവരുടെ സര്ട്ടിഫിക്കറ്റുകള്ക്കും ആവശ്യക്കാരേറയായി.
കേരള, എംജി സര്വകലാശാലകള് ഓണ്ലൈന് വഴി അപേക്ഷകള് സ്വീകരിച്ച് സര്ട്ടിഫിക്കറ്റ് പരിശോധനകള് സര്വകലാശാല തലത്തില് പൂര്ത്തീകരിക്കുന്നു. എന്നാല് കാലിക്കറ്റ്, കണ്ണൂര് സര്വകലാശാലകള് കോളേജുകളില് നിന്നും ഇപ്പോഴും അപേക്ഷകള് നേരിട്ടാണു സ്വീകരിക്കുന്നത്.
ഇത്തരത്തില് വ്യത്യസ്ത രീതികള് പല സര്വകലാശാലകളും പിന്തുടരുന്നതോടെ അനര്ഹരായ പലരും ലിസ്റ്റില് കടന്നുകൂടുകയും അര്ഹര്ക്കു വേണ്ട പരിഗണന ലഭിക്കാതെയും പോകുന്നുവെന്ന ആക്ഷേപവും നിലനില്ക്കുന്നുണ്ട്