കൊച്ചി: കേരളത്തിലെ പ്രളയ രക്ഷാ പ്രവര്ത്തനങ്ങള്ക്ക് സഹായമേകാന് മൊബൈല്ദാതാക്കള്.ദുരന്തസാഹചര്യം മുന്നിറുത്തി ടെലികമ്മ്യൂണിക്കഷന്സ് സേവന ദാതാക്കളായ ഭാരതി എയര്ടെല് വരിക്കാര്ക്കായി നിരവധി ഓഫറുകളാണ് പ്രഖ്യാപിച്ചിരിക്കുന്നത്.
പ്രളയ ബാധിത മേഖലകളിലെ എല്ലാ എയര്ടെല് വരിക്കാരും എപ്പോഴും കണക്റ്റഡായിരിക്കാന് ഡാറ്റാ നേട്ടങ്ങളോടൊപ്പം സൗജന്യ ടോക്ക് ടൈമും എസ്എംഎസ് സൗകര്യവുമാണ് ലഭ്യമാക്കുന്നത്. പ്രീ-പെയ്ഡ് വരിക്കാരുടെ ഔട്ട്ഗോയിംഗ് കോളുകളുടെയും മറ്റു സേവനങ്ങളുടെയും വാലിഡിറ്റിയും പോസ്റ്റ്പെയ്ഡ് വരിക്കാരുടെ ബില്ല് തീയതികളും ഓഗസ്റ്റ് 16 വരെ എയര്ടെല് നീട്ടിയിട്ടുണ്ട്.
അതോടൊപ്പം, കാണാതായ ആളുകളെ കണ്ടെത്താന് സഹായകമാകുന്ന ടോള്-ഫ്രീ നമ്പറും എയര്ടെല് സജ്ജമാക്കിയിട്ടുണ്ട്. 1948 എന്ന നമ്പറില് വിളിച്ച് പ്രളയ ബാധിത മേഖലകളില് ബന്ധുക്കളുടെയും സുഹൃത്തുക്കളുടെയും അടുത്ത് എത്തിച്ചേരാന് സാധിക്കാത്തവര്ക്ക് വിവരങ്ങളറിയാനും അവസരമൊരുക്കുന്നു.
കൂടാതെ, പ്രളയ ബാധിത മേഖലകളില് ടവറുകളും നെറ്റ്വര്ക്കുകളും പ്രവര്ത്തനക്ഷമമാണെന്ന് ഉറപ്പരുവരുത്താനും ആവശ്യം വേണ്ടതായ ഇന്ധനം കരുതുവാനും എയര്ടെല് രംഗത്തുണ്ട്.
അപ്രതീക്ഷിത പ്രളയം മൂലം ദുരിതം അനുഭവിക്കുന്ന കേരളത്തിലെ ജനങ്ങള്ക്ക് ഏതു സമയത്തും മൊബൈല് നെറ്റ്വര്ക്ക് തടസ്സംകൂടാതെ ലഭ്യമാക്കുവാന് എയര്ടെല് പരമാവധി ശ്രമിക്കുന്നുണ്ടെന്ന് ഭാരതി എയര്ടെല്, കേരള സിഇഒ നാഗാനന്ദ പറഞ്ഞു.
വരിക്കാര്ക്ക് അവരുടെ ബന്ധുക്കളും സുഹൃത്തുക്കളുമായി ബന്ധപ്പെട്ടുകൊണ്ടിരിക്കാന് വേണ്ട നടപടികളെല്ലാം കൈകൊള്ളുന്നുണ്ടെന്നും തദ്ദേശ സ്ഥാപന അധികൃതര്ക്കും ദുരിതാശ്വാസ പ്രവര്ത്തകര്ക്കും ആവശ്യമായ എല്ലാ സഹായങ്ങളും നല്കുമെന്നും അദ്ദേഹം കൂട്ടിച്ചേര്ത്തു.
