സാന്ഫ്രാന്സിസ്കോ: യൂട്യൂബ് ചാനലുകള്ക്ക് നേരെ ഹാക്കര്മാരുടെ ആക്രമണ ശ്രമം. ഫിഷിങ് ഈമെയിലുകള് ഉപയോഗിച്ചാണ് ഹാക്കര്മാര് യൂട്യൂബ് ചാനലുകള് ഹാക്ക് ചെയ്യാന് ശ്രമിക്കുന്നത്. യൂട്യൂബ് ക്രിയേറ്റര്മാരെ വ്യാജ ഗൂഗിള് ലോഗിന് പേജുകളില് എത്തിച്ച ശേഷം വിവരങ്ങള് കൈക്കലാക്കുന്നതായാണ് സൈബര് സുരക്ഷാ വിഭാഗം കണ്ടെത്തിയിരിക്കുന്നത്.
വാഹനങ്ങളുമായി ബന്ധപ്പെട്ട വീഡിയോകള് അപ്ലോഡ് ചെയ്യ്തിട്ടുള്ള ചാനലുകള്ക്ക് നേരെയാണ് ഹാക്കിങ് നടക്കുന്നത്. ഒന്നിലധികം ഹാക്കര്മാര് ഇതിനു പിന്നിലുണ്ടാകാം എന്നാണ് സൈബര് വിദഗ്ധര് പറയുന്നത്.
ആളുകളുടെ അറിവില്ലായ്മ മൂലമാണ് നിരന്തരമായി സൈബര് ആക്രമങ്ങള്ക്ക് ഇരയാകുന്നതെന്നാണ് അധികൃതരുടെ വിശദീകരണം. ലോഗിന് പേജില് പ്രവേശിക്കാന് ഗൂഗിള് ഐഡിയും പാസ്വേര്ഡും നല്കുന്നതാണ് ഹാക്കര്മാര്ക്ക് അക്കൗണ്ട് കയ്യടക്കാന് സഹായകമാകുന്നത്.
എന്നാല് സുരക്ഷയ്ക്കായി നിരവധി സംവിധാനങ്ങള് ഗൂഗിള് ഒരുക്കുന്നുണ്ടെങ്കിലും അവയെ വേണ്ടവിധം പ്രയോജനപ്പെടുത്താതെ വരുന്നതാണ് ഹാക്കര്മാരുടെ ഇരയാകാന് പ്രധാന കാരണം. യൂസര് ഐഡിയ്ക്കും പാസ്വേര്ഡിനും പുറമേ ടൂ ഫാക്ടര് ഒതന്റിക്കേഷന് സംവിധാനവും ഗൂഗിള് സുരക്ഷയ്ക്കായി നല്കുന്നുണ്ട്. ഈ സംവിധാനം ഉപയോഗപ്പെടുത്തിയാല് അപരിചിത ഉറവിടങ്ങളില് നിന്നും പേജ് ലോഗിന് ചെയ്യാന് ഫോണിലെ ഒടിപി നല്കിയെങ്കിലെ സാധ്യമാകൂ.
ഇന്ത്യയിലും ഇത്തരത്തില് യൂട്യൂബ് ചാനലുകള് ഹാക്ക്് ചെയ്തതായി പരാതി ലഭിച്ചിട്ടുണ്ട്. ഹാക്കിങ്ങിലൂടെ നിരവധി ആളുകളുടെ ചാനലുകളാണ് നഷ്ടപ്പെട്ടിട്ടുള്ളത്. ആര്ക്കും എളുപ്പത്തില് മനസിലാക്കാന് സാധിക്കാത്ത പാസ്വേര്ഡുകളും, ടൂ ഫാക്ടര് ഒതന്റിഫിക്കേഷന് സംവിധാനവും കൃത്യമായി പ്രയോജനപ്പെടുത്തണമെന്നാണ് സൈബര് വിദഗ്ധര് ആവശ്യപ്പെടുന്നത്.
