കാലിഫോർണിയ: വമ്പൻ മാറ്റത്തിനൊരുങ്ങി ലോകത്തിലെ തന്നെ ഏറ്റവും ജനപ്രീതിയുള്ള സാമൂഹിക മാദ്ധ്യമമായ ഫേസ്ബുക്. പോസ്റ്റുകൾക്ക് എത്ര ലൈക്ക് ലഭിച്ചുവെന്ന് കാണിക്കുന്നത് ഫേസ്ബുക് നിർത്തലാക്കുന്നുവെന്നതാണ് ഇപ്പോൾ പുറത്തുവരുന്ന ഏറ്റവും പുതിയ റിപ്പോർട്ടുകൾ. പോസ്റ്റ് ഇടുന്ന വ്യക്തിക്ക് മാത്രമേ ലൈക്കിന്റെ എണ്ണം കാണുവാൻ സാധിക്കൂ. സ്വകാര്യത ഉറപ്പുവരുത്താനാണ് മാറ്റമെന്നാണ് ഫേസ്ബുക്കിന്റെ പ്രതികരണം.
പരീക്ഷണാടിസ്ഥാനത്തിൽ ഓസ്ട്രേലിയ അടക്കമുള്ള ചില രാജ്യങ്ങളി. ഈ ഫീച്ചർ അവതരിപ്പിച്ചുകഴിഞ്ഞു. ഉപയോക്താക്കളുടെ പ്രതികരണം അറിഞ്ഞതിന് ശേഷം വേണ്ട മാറ്റങ്ങൾ വരുത്തും. മാറ്റം ഉപഭോക്താക്കൾക്ക് ഉൾക്കൊള്ളാൻ സാധിക്കുന്നുണ്ടോ എന്ന് അറിഞ്ഞതിന് ശേഷമാകും ഫീച്ചർ മറ്റ് രാജ്യങ്ങളിലേക്ക് വ്യാപിപ്പിക്കുന്നതിനുള്ള പദ്ധതി ഫേസ്ബുക് ആരംഭിക്കൂ.
തന്റെ പോസ്റ്റിനേക്കാൾ കൂടുതൽ ലൈക്ക് മറ്റുള്ളവർക്ക് ലഭിക്കുന്നു.തന്റെ പോസ്റ്റിന്റെ ലൈക്കുകൾ കുറയുന്നൂ തുടങ്ങിയ മാനസിക സമ്മർദ്ദങ്ങൾ ഉപഭോക്താക്കൾക്കുണ്ടാകുന്നുവെന്ന ആരോപണം ഒവിവാക്കാനാണ് ഇത്തരമൊരു ഫീച്ചറെന്ന് ഫേസ്ബുക് നേരത്തെ പറഞ്ഞിരുന്നു.
അടുത്തിടെ ഫേസ്ബുക്കിന്റെ തന്നെ ഉടമസ്ഥതയിലുള്ള ഇൻസ്റ്റഗ്രാമിലെ ലൈക്കിന്റെ എണ്ണവും സമാനമായ രീതിയിൽ ഒഴിവാക്കിയിരുന്നു. ഓസ്ട്രേലിയ, കാനഡ, ബ്രസീല്, ന്യൂസിലന്ഡ്, അയര്ലന്ഡ്, ഇറ്റലി, ജപ്പാന് തുടങ്ങിയ രാജ്യങ്ങളിൽ ജൂലൈ മുതലായിരുന്നു ഈ ഫീച്ചർ നിലവിൽ വന്നത്.
