ന്യൂയോര്‍ക്ക്: രാഷ്ട്രീയ പരസ്യങ്ങള്‍ക്ക് നിരോധനം ഏര്‍പ്പെടുത്തി ട്വിറ്റര്‍. നവംബര്‍ 22 മുതല്‍ ട്വിറ്ററിലെ രാഷ്ട്രീയ പരസ്യനിരോധനം പ്രാബല്യത്തില്‍ വരും. കമ്പനി സിഇഒ ജാക്ക് ഡോഴ്‌സിയാണ് തീരുമാനം പ്രഖ്യാപിച്ചത്.
ഇത്തരം സന്ദേശങ്ങള്‍ക്ക് പണം നല്‍കി പിന്തുണ വാങ്ങുകയല്ല, നേടുകയാണ് വേണ്ടതെന്ന് ജാക്ക് ഡോഴ്‌സി ട്വിറ്ററില്‍ അറിയിച്ചു. തീരുമാനത്തെ സംബന്ധിച്ച് കൂടുതല്‍ വിവരങ്ങള്‍ നവംബര്‍ 15ന് പുറത്തുവിടുമെന്നും അദ്ദേഹം പറഞ്ഞു. രാഷ്ട്രീയ പരസ്യങ്ങള്‍ക്ക് നിരോധനം ഏര്‍പ്പെടുത്തുന്ന തീരുമാനം ട്വിറ്ററിലൂടെയാണ് അദ്ദേഹം അറിയിച്ചത്.
രാഷ്ട്രീയ പരസ്യങ്ങള്‍ നിരോധിക്കില്ലെന്ന് ഫേസ്ബുക്ക് കഴിഞ്ഞ ദിവസം വ്യക്തമാക്കിയതിന് പിന്നാലെയാണ് ട്വിറ്ററിന്റെ പ്രഖ്യാപനം. കഴിഞ്ഞ യുഎസ് തെരഞ്ഞെടുപ്പില്‍ സമൂഹമാദ്ധ്യമങ്ങള്‍ സ്വാധീനം ചെലുത്തിയെന്നും റഷ്യയുടെ ഇടപെടലുണ്ടായെന്നും ആരോപണങ്ങള്‍ ഉയര്‍ന്നിരുന്നു. ഇതേ തുടര്‍ന്ന് 2020 യുഎസ് തെരഞ്ഞെടുപ്പിന് മുന്നോടിയായി സമൂഹ മാദ്ധ്യമങ്ങള്‍ക്ക് നിരീക്ഷണം ശക്തമാക്കാന്‍ തീരുമാനിച്ചിട്ടുണ്ട്.
