പലപ്പോഴും ആവശ്യമായ രേഖകള് കൈവശം വെക്കാന് നമ്മളെല്ലാവരും മറന്നുപോകാറുണ്ട്. പ്രത്യേകിച്ച് വാഹനങ്ങളുമായി ബന്ധപ്പെട്ട രേഖകളാണ് ഒട്ടുമിക്ക ആളുകളും കൈവശം വെക്കാന് മറന്നുപോകാറുള്ളത്. ആര്സി ബുക്ക്, ഡ്രൈവിംഗ് ലൈസന്സ്, ഫിറ്റ്നസ് സര്ട്ടിഫിക്കറ്റ്, ടാക്സ് രസീത് എന്നിവ ആവശ്യമുള്ള സമയങ്ങളില് ഹാജരാക്കാന് കഴിയാത്തതിന് പിഴ അടച്ചിട്ടുള്ളവരാണ് ഏറെയും.
എന്നാല് ഇതിന് പരിഹാരമെന്നോണം ഇലക്ട്രോണിക്സ് ആന്ഡ് ഇന്ഫര്മേഷന് ടെക്നോളജി മന്ത്രാലയം വികസിപ്പിച്ചെടുത്ത ‘ഡിജി ലോക്കര്’ എന്ന ആപ്ലിക്കേഷന് രേഖകള് ഡിജിറ്റലായി സൂക്ഷിക്കാനും ആവശ്യാനുസരണം ഉപയോഗിക്കാനും സാധിക്കും.
ഡിജിറ്റല് രൂപത്തില് രേഖകള് സൂക്ഷിക്കാനും പരിശോധനകള്ക്ക് വിധേയമാക്കാനും നിയമം അനുവദിക്കുന്നുണ്ട്. എന്നാല് ഈ സൗകര്യം പലര്ക്കും അറിയില്ല, അറിയുന്നവരാണെങ്കില് പ്രയോജനപ്പെടുത്തുന്നുമില്ല. കേന്ദ്രസര്ക്കാരിന്റെ ഈ സേവനം ഉപയോഗപ്പെടുത്താന് താഴെ പറയുന്ന കാര്യങ്ങള് മാത്രം ചെയ്താല് മതി
1. ഗൂഗിള് പ്ലേ സ്റ്റോര്/ആപ്പിള് സ്റ്റോറില് നിന്ന് ‘ഡിജി ലോക്കര്’ ആപ്പ് ഡൗണ്ലോഡ് ചെയ്യുക. ഡിജി ലോക്കറിന്റെ വെബ്സൈറ്റില് നിന്നും ആപ്പ് ഡൗണ്ലോഡ് ചെയ്യാവുന്നതാണ്.
2. മൊബൈല് നമ്പറും പാസ്വേഡും ചേര്ത്ത ശേഷം ലഭിക്കുന്ന ഒടിപി (വണ് ടൈം പാസ്വേഡ്) യുടെ സഹായത്തോടെ രജിസ്റ്റര് ചെയ്യുക.
3. ആധാര് നമ്പര് ചേര്ത്ത് ആപ്പിലെ പ്രസിദ്ധീകരിച്ച രേഖകള് കാണാന് സാധിക്കും.
4. റോഡ് ട്രാന്സ്പോര്ട്ട്-ഹൈവെ മന്ത്രാലയം, സംസ്ഥാനങ്ങള് എന്ന ലിങ്ക് ഓപ്പണ് ചെയ്ത് രേഖകള് ഡൗണ്ലോഡ് ചെയ്ത് ഡിജിറ്റല് രൂപത്തില് സൂക്ഷിക്കാവുന്നതാണ്.
5. നിലവില് പുക പരിശോധന സര്ട്ടിഫിക്കറ്റ് ഡൗണ്ലോഡ് ചെയ്യാന് സാധിക്കില്ല. അധികം താമസിക്കാതെ തന്നെ ഈ സേവനവും ആപ്ലിക്കേഷന് വഴി ലഭ്യമാകുന്നതാണ്.
