ബെംഗളൂരു: ഭൗമ നിരീക്ഷണത്തിന്റെ ഭാഗമായി വികസിപ്പിച്ച അത്യാധുനിക കാര്ട്ടോസാറ്റ് -3യുടെ വിക്ഷേപണത്തിന്റെ കൗണ്ട് ഡൗണ് ആരംഭിച്ചു. നവംബര് 27-ന് രാവിലെ 9.28 ന് ശ്രീഹരിക്കോട്ടയിലെ സതീഷ് ധാവന് ബഹിരാകാശ കേന്ദ്രത്തിലെ രണ്ടാം ലോഞ്ച് പാഡില് നിന്നാണ് കാര്ട്ടോസാറ്റ് വിക്ഷേപിക്കുക.
കാര്ട്ടോസാറ്റ്-3ന് 1,625 കിലോഗ്രാം ഭാരമാണ് ഉള്ളത്. ബഹിരാകാശത്ത് ഇതിന് അഞ്ചു വര്ഷമാണ് കാലാവധി. 97.5 ഡിഗ്രി ചരിവില് 509 കിലോമീറ്റര് ഭ്രമണ പഥത്തിലാണ് കാര്ട്ടോസാറ്റ്-3 സ്ഥാപിക്കുക.
ഉയര്ന്ന റെസല്യൂഷന് ഇമേജിങ് ശേഷിയുള്ള മൂന്നാം തലമുറയിലെ ഏറ്റവും പുതിയ ഉപഗ്രഹമാണ് കാര്ട്ടോസാറ്റ് 3. കാര്ട്ടോസാറ്റ് 2-നേക്കാള് വ്യക്തമായി സ്ഥലങ്ങളുടെ മാപ്പുകള് തയ്യാറാക്കാനും ചിത്രങ്ങള് എടുക്കാനും കാര്ട്ടോസാറ്റ് 3ക്ക് സാധിക്കും. കാലാവസ്ഥ മാപ്പിങ്, ഭൂപടങ്ങളെ സംബന്ധിച്ച പഠനം എന്നിവയ്ക്കും ഈ ഉപഗ്രഹം ഉപയോഗപ്പെടുത്താം.
കാര്ട്ടോസാറ്റിനൊപ്പം വാണിജ്യ ആവശ്യങ്ങള്ക്കുള്ള അമേരിക്കയുടെ 13 ചെറു ഉപഗ്രഹങ്ങളും ഭൂമിയുടെ ഭ്രമണപഥത്തിലെത്തിക്കും. അമേരിക്കയുടെ ഉപഗ്രഹങ്ങളില് 12 എണ്ണം ഫ്ളോക്ക് -4 പി വിഭാഗത്തില്പെട്ട ഭൂമി നിരീക്ഷണ ഉപഗ്രഹങ്ങളാണ്. ഒരെണ്ണം കമ്മ്യൂണിക്കേഷന് ടെസ്റ്റ് ബെഡ് ഉപഗ്രഹമായ മെഷ്ബെഡാണ്.
