കൊറോണ വൈറസ് വ്യാപനം മൂലം ബാധിക്കപ്പെട്ട ലോകത്തിന്റെ വിവിധ ഭാഗങ്ങളിലുള്ള മാദ്ധ്യമങ്ങള്ക്ക് സഹായകവുമായി ഗൂഗിള്. ചെറുകിട, മധ്യവര്ഗ പ്രാദേശിക മാദ്ധ്യമങ്ങള്ക്ക് സഹായകമായാണ് ഗൂഗിള് ജേണലിസം എമര്ജന്സി റിലീഫ് ഫണ്ട് പ്രഖ്യാപിച്ചിരിക്കുന്നത്. പകര്ച്ച വ്യാധിയുടെ കാലത്ത് യഥാര്ത്ഥ വാര്ത്തകള് നല്കുന്ന മാദ്ധ്യമ സ്ഥാപനങ്ങള്ക്കാണ് സാമ്പത്തിക സഹായം നല്കുക.
10,000 ഡോളര് നിലവാരത്തിലായിരിക്കും തുക സഹായധനമായി ലഭിക്കുക. ഇത് സ്ഥാപനങ്ങളുടെ വലുപ്പം അനുസരിച്ചും പ്രാദേശിക അടിസ്ഥാനത്തിലും വ്യത്യാസപ്പെടും. താത്പര്യമുള്ള പ്രസാധകർക്ക് ഫണ്ടിനായി അപേക്ഷിക്കാം. ഏപ്രില് 29 ആണ് അവസാന തീയതി. അപേക്ഷകള് ലഭിച്ചതിന് ശേഷം ആര്ക്കെല്ലാം ഫണ്ട് നല്കുമെന്ന് ഗൂഗിള് പ്രഖ്യാപിക്കും.
കൊറോണ വൈറസ് വ്യാപിക്കുന്ന പശ്ചാത്തലത്തില് സമൂഹത്തിന്റെ മുന്നിരയില് പ്രവര്ത്തിക്കുന്ന റിപ്പോര്ട്ടര്മാരെ ബാധിക്കുമെന്ന് മനസിലാക്കുന്നുവെന്ന് ഗൂഗിള് പറഞ്ഞു. അതുകൊണ്ടാണ് ആഗോള തലത്തില് അടിയന്തര വിഭവങ്ങളും പിന്തുണയും എത്തിക്കുന്ന ഇന്റര്നാഷണല് സെന്റര് ഫോര് ജേണലിസ്റ്റിനും കൊളംബിയ ജേണലിസം സ്കൂളിന്റെ ഡാള്ട്ട് സെന്റര് ഫോര് ജേണലിസം ആന്ഡ് ട്രോമയ്ക്കും ഗൂഗിള് സഹായം നല്കുന്നതെന്നും ഗൂഗിള് ന്യൂസ് വൈസ് പ്രസിഡന്റ് റിച്ചാര്ഡ് ജിന്ഗ്രാസ് വ്യക്തമാക്കി.
