ഇസ്ലാമാബാദ്: പാകിസ്താനിലെ കൊറോണ പ്രതിരോധപ്രവര്ത്തനം താളം തെറ്റിയെന്ന് പാക് സൈന്യം. ഇമ്രാന്ഖാന്റെ ഭരണത്തിനെതിരെ പാക്സൈനിക മേധാവികളില് അതൃപ്തിയെന്ന് അന്താരാഷ്ട്ര വാര്ത്താ മാദ്ധ്യമങ്ങള് റിപ്പോര്ട്ട് ചെയ്യുന്നു. രാജ്യത്തെ കൊറോണ പ്രവര്ത്തനങ്ങളുടെ ഏകോപനമില്ലായ്മയിലാണ് സൈന്യത്തിലെ ഉയര്ന്ന ഉദ്യോഗസ്ഥന്മാര് കടുത്ത അമര്ഷം രേഖപ്പെടുത്തിയത്. വിമര്ശനങ്ങള് ശക്തമായതോടെ കൊറോണ പ്രതിരോധ പ്രവര്ത്തനങ്ങളുടെ ഏകോപനത്തിനായി സൈനിക ഉദ്യോഗസ്ഥരെ ഇമ്രാന്ഖാന് നിയോഗിച്ചിരുന്നു. ഇക്കാരണത്താല് വ്യക്തിപരമായി ഇമ്രാന്ഖാനെ പിണക്കാതെയുള്ള വിമര്ശനങ്ങളാണ് സൈനിക മേധാവികള് നടത്തുന്നത് എന്നത് ശ്രദ്ധേയമാണ്.
ജനാധിപത്യ സംവിധാനങ്ങളെ നോക്കുകുത്തിയാക്കിയാണ് സൈന്യം പലയിടത്തും പ്രവര്ത്തിക്കുന്നത്. ഇമ്രാന്ഖാനെ പൂര്ണ്ണമായും നിയന്ത്രണത്തിലാക്കിയുള്ള നടപടികളാണ് ഭരണകാര്യത്തില് സൈനിക മേധാവികള് നടത്തുന്നതെന്നും വാര്ത്താ ഏജന്സികള് ചൂണ്ടിക്കാട്ടുന്നു. പാകിസ്താന്റെ സുപ്രധാന വകുപ്പുകളിലെല്ലാം മന്ത്രിമാരേക്കാള് വിശ്വസ്തരായ സൈനിക ഉദ്യോഗസ്ഥരെയാണ് ഇമ്രാന്ഖാന് കഴിഞ്ഞ ഒരു മാസത്തിനുള്ളില് വച്ചിരിക്കുന്നത്. മുന് സൈനിക മേധാവികളെയെല്ലാം സര്ക്കാര് വകുപ്പുകളിലേക്ക് വിളിപ്പിച്ചിരിക്കുകയാണ്. കൊറോണ പശ്ചാത്തലത്തില് ദേശീയ ആരോഗ്യവിഭാഗത്തിന്റെ തലവനായി മുന്സൈനിക മേധാവിയെ നിയമിച്ചതോടെയാണ് സൈന്യത്തിന്റെ പിടിമുറുകുന്നു എന്ന സൂചന മാദ്ധ്യമങ്ങള്ക്ക് ലഭിച്ചത്.
സൈന്യത്തിന് കൂടുതല് സ്വാധീമുള്ള സിന്ധ്, പഞ്ചാബ് പ്രവിശ്യകളിലെ ലോക്ഡൗണ് നിയന്ത്രണങ്ങളടക്കം കര്ശനമാക്കിയിരിക്കുകയാണ്. എന്നാല് ജനാധിപത്യ സംവിധാനങ്ങളുള്ള മേഖലകളിലെല്ലാം മെല്ലെപോക്ക് ദൃശ്യമാണ്. രാജ്യത്തെ കൊറോണ ബാധിതരുടെ എണ്ണം പോലും നിലവില് കൃത്യമല്ലെന്നുമുള്ള മാദ്ധ്യമ റിപ്പോര്ട്ടാണ് പുറത്തുവരുന്നത്. ഇതിനിടെ രാജ്യത്തെ സാമ്പത്തിക പ്രതിസന്ധി രൂക്ഷമായത് പരിഹരിക്കാന് ലോക്ഡൗണ് ലഘൂകരിക്കാനാണ് ഇമ്രാന്ഖാന് നിര്ദ്ദേശിച്ചിരിക്കുന്നത്.
