അത്യാഢംബരത്തിന് ഒരു അവസാന വാക്കുണ്ടെങ്കില് അത് ഇതാണ്. ബ്രൂണയ് രാജാവ് ഹസനല് ബോല്ക്കെയ്നിയുടെ കൊട്ടാരം, വിശേഷങ്ങള് കേട്ടാല് ആരുമൊന്നു അമ്പരന്നു പോകും. അത്രയ്ക്ക് കൗതുകമുണര്ത്തുന്ന സംഭവങ്ങളാണ് ഈ മാളികയെപ്പറ്റി പറയാനുള്ളത്.ലോകത്തെ അഞ്ചാമത്തെ സമ്പന്ന രാജ്യമായ ബ്രൂണയുടെ രാജാവും പ്രധാനമന്ത്രിയുമാണ്ഹസനല് ബോല്ക്കെയ്നി.ബ്രൂണയുടെ ധന, പ്രതിരോധ, വിദേശ വകുപ്പുകള് കൈകാര്യം ചെയ്യുന്നതും ഇദ്ദേഹമാണ്.
കൊട്ടാരത്തിലെ കിടപ്പ്മുറിയും, സ്വീകരണമുറിയും, കുളിമുറിയും, ടോയ്ലറ്റും വരെ നിര്മ്മിച്ചിരിക്കുന്നത് സ്വര്ണ്ണം കൊണ്ടാണ്. ഒരു കുടുംബത്തിനായി താമസിക്കാന് വേണ്ടി നിര്മിച്ച വീടുകളില് വെച്ച് ലോകത്തിലെ ഏറ്റവും വലിയ വീടാണ് ഇത്. 48 ഏക്കറില് 2152,782 സ്ക്വയര് ഫീറ്റ് വിസ്തീര്ണമുള്ള ഇസ്താന നൂറുല് ഇമാന് കൊട്ടാരത്തിന്റെ മതിപ്പ് വില 1.4 ബില്ല്യണ് ഡോളറാണ് (അതായത് ഇന്ത്യൻ രൂപ 8,964 കോടി രൂപ.).
1788 മുറികളാണ് ഈ വീടിനുള്ളത്. 257 ബാത്ത്റൂമുകള്, 110 കാര് ഗ്യാരേജുകള്, അഞ്ചു സ്വിമ്മിങ് പൂളുകള് എന്നിങ്ങനെ നീളുന്നു ഇവിടത്തെ ആഢംബരങ്ങള്. 1500 പേരെ സുഖമായി ഈ വീടിനുള്ളില് ഉള്ക്കൊള്ളിക്കാന് കഴിയുകയും ചെയ്യും.
ഈ രാജാവിന് അയ്യായിരത്തിലേറെ കാറുകളുണ്ട്. 604 റോള്സ് റോയ്സ്, 500 ബെന്സ്, 209 ബി എം ഡബ്ലൂ, 452 ഫെറാറി, 350 ബെന്റ്ലെ, 179 ജാഗ്വാര്, 21 ലംബോര്ഗിനി എന്നിങ്ങനെ നീളുന്നു കാറുകളുടെ ശേഖരം. ബ്രൂണയ് രാജാവിന്റെ വാഹനകമ്പം നേരത്തെ തന്നെ വാര്ത്തകളില് നിറഞ്ഞതാണ്. 220 മില്യന് ഡോളര് വിലയുള്ള സ്വകാര്യ വിമാനവും ഈ രാജാവിനുണ്ട്. ഇന്റീരിയര് പൂര്ണമായും സ്വര്ണ ഡിസൈന് ചെയ്ത ഈ സ്വകാര്യ ജെറ്റ് വിമാനത്തില് ലിവിങ്ങ് , കോണ്ഫറന്സ് , ബെഡ് റൂമുകളുമുണ്ട് .
ഏഷ്യയിലെ ഏറ്റവും വലിയ ദ്വീപായ ബോര്ണിയോയുടെ വടക്കുകിഴക്ക്, മൂന്നു വശം മലേഷ്യന് സംസ്ഥാനമായ സറാവാകും ഒരുവശം ദക്ഷിണ ചൈന കടലാലും ചുറ്റപ്പെട്ടു കിടക്കുന്ന കൊച്ചു രാജ്യമാണ് ബ്രുണെ. നമ്മുടെ കോഴിക്കോട്, മലപ്പുറം ജില്ലകള് കൂടിച്ചേര്ന്നാല് ബ്രൂണെയേക്കാള് വലുതാകും എന്നു പറഞ്ഞാല് ഈ രാജ്യത്തിന്റെ വലുപ്പം മനസ്സിലാകും. എന്നാല്, ജനസംഖ്യയാകട്ടെ ഈ രണ്ടു ജില്ലകളുടെ പതിനാറിലൊന്നും.
സുല്ത്താന്റെ മകളുടെ വിവാഹം ഈ കൊട്ടാരത്തിൽ വെച്ച് നടന്നിരുന്നു. ഇതുമായി ബന്ധപ്പെട്ട ചടങ്ങുകളുടെ പല ഫോട്ടോകളും പുറത്തുവന്നതോടെയാണ് കൊട്ടാരത്തിലെ ആഢംബരങ്ങളുടെ വിവരങ്ങള് പുറംലോകം അറിയാനിടയായത്.
