മുംബൈ: വിദേശ മണ്ണില്‍ ഏത് എതിരാളിയേയും തങ്ങള്‍ തകര്‍ത്തെറിയുമെന്ന ദാദയുടെ പ്രഖ്യാപനമായിരുന്നു ആ ഷര്‍ട്ടൂരിയുള്ള വീശല്‍. ലോര്‍ഡ്സിലെപ്ലെയേഴ്‌സ് പവലിയനില്‍ 1983ലെ ലോകകപ്പ് വിജയത്തിന് ശേഷം അത്രയും തന്നെ ത്രസിപ്പിക്കുന്ന വിജയം ഇന്ത്യ ഇംഗ്ലണ്ടിനെതിരെ നേടിയ മുഹൂര്‍ത്തത്തിന് ഇന്ന് 18 വയസ്സ്.
ഇംഗ്ലണ്ടിന്റെ സ്വന്തം തട്ടകം. അവര്‍ ഫൈനലില്‍ മുന്നോട്ട് വച്ചത് 326 എന്ന കൂറ്റന്‍ സ്‌കോര്‍. ഒരു ഏകദിനത്തില്‍ അടിച്ചെടുക്കാന്‍ ഏതു ടീമും പേടിക്കുന്ന സ്‌കോര്‍. എന്നാല്‍ അന്നത്തെ ഇന്ത്യയുടെ രണ്ടു യുവതുര്‍ക്കികളായ കൈഫും യുവരാജും ധീരനായ തങ്ങളുടെ നായകന്‍ സൗരവ് ഗാംഗുലിയ്‌ക്ക് കിരീടം സമ്മാനിച്ചാണ് മൈതാനം വിട്ടത്.
അന്നും ഇതുപോലൊരു ജൂലൈ 13 ആയിരുന്നു. ഇന്ത്യ വിജയിച്ച നിമിഷത്തെ ദാദയുടെ ആക്രമണവീര്യം വിജയാഹ്ലാദത്തിലും പ്രകടമായി. ലോകത്തെ മുഴുവന്‍ സാക്ഷിയാക്കി സ്വന്തം ഷര്‍ട്ടൂരി ഗാംഗുലി വീശിക്കൊണ്ടിരുന്നത് ഏതു വിദേശ മണ്ണിലും ഞങ്ങള്‍ പോരാടി നേടും എന്ന പ്രഖ്യാപനം തന്നെയായിരുന്നു. ഇംഗ്ലണ്ടിനെതിരെ 38 വര്‍ഷം മുമ്പ് ഇന്ത്യ ഏകദിന ക്രിക്കറ്റിന് അരങ്ങേറ്റം കുറിച്ച ശേഷമുള്ള ലോര്‍ഡ്‌സിലെ ചരിത്രവിജയമായിരുന്നു അത്.
ഗാംഗുലി മികച്ച തുടക്കമിട്ട മറുപടി ബാറ്റിംഗാണ് കലാശപോരാട്ടത്തില്‍ കണ്ടത്.43 പന്തില്‍ 60 റണ്‍സാണ് നായകന്‍ നേടിയത്. സെവാഗ് 45 റണ്‍സും നേടി. 106ന്റെ ഓപ്പണിംഗ് കൂട്ടുകെട്ട് തീര്‍ത്ത ഇന്ത്യ 5ന് 145 എന്ന നിലയിലേക്ക് തകരുന്ന കാഴ്ചയാണ് പിന്നെ കണ്ടത്. ദ്രാവിഡും സച്ചിനും ഇന്ത്യക്ക് നഷ്ടമായി. തുടര്‍ന്നാണ് അറിയപ്പെട്ടു തുടങ്ങിയ യുവിയും 16 ഏകദിനം മാത്രം കളിച്ച കൈഫും ക്രീസില്‍ നിലയുറപ്പിച്ചത്. 69 റണ്‍സുമായി യുവരാജ് 42-ാം ഓവറില്‍ മടങ്ങുമ്പോള്‍ ഇന്ത്യ 267ല്‍ എത്തിയിരുന്നു. ഒരറ്റത്ത് ഉറച്ചു നിന്ന കൈഫ് ഹര്‍ഭജനുമായി ചേര്‍ന്ന് ഇന്ത്യയുടെ വിജയം കയ്യിലാക്കി. 75 പന്തില്‍ 87 റണ്‍സെടുത്താണ് കൈഫ് നാറ്റ് വെസ്റ്റ് കിരീടം ഇന്ത്യയ്‌ക്ക് സമ്മാനിച്ചത്. തികച്ചും യാദൃശ്ചികമെന്നോണം തന്റെ ക്രിക്കറ്റ് ജീവിതം കൈഫ് അവസാനിപ്പിച്ചതും 2018ലെ ഒരു ജൂലൈ 13നായിരുന്നു.
