മിലാന്: സിരി ഏയില് യുവന്റസിന് ഭീഷണിയായി ഇന്റര്മിലാന് ജയം. ഇന്നു നടന്ന മത്സരത്തില് നാപ്പോളിയെ എതിരില്ലാത്ത രണ്ടു ഗോളുകള്ക്കാണ് ഇന്റര് മിലാന് തോല്പ്പിച്ചത്. ഡാനീലിയോ അംബ്രോസോ 11-ാം മിനിറ്റിലും ലൗറ്റാരോ മാര്ട്ടിനസ് 74-ാം മിനിറ്റിലുമാണ് ഗോള് നേടിയത്. ജയത്തോടെ ഇന്റര്മിലാന് ലീഗിലെ ഒന്നാം സ്ഥാനത്തുള്ള യുവന്റസുമായി വെറും നാലു പോയിന്റ് വ്യത്യാസത്തിലെത്തി.നാപ്പോളി നിലവില് ഏഴാം സ്ഥാനത്താണ്. യുവന്റസിന് രണ്ടു മത്സരവും ഇന്റര്മിലാന് ഒരെണ്ണവുമാണ് ഇനി ബാക്കിയുള്ളത്.
ഇന്നു ആകെ അഞ്ചു മത്സരങ്ങളാണ് ഇനി നടക്കാനുള്ളത്. വെറോണ സ്പാളിനെതിരേയും ഉദിനീസെ ലെസ്സേക്കെതിരേയും ആദ്യ രണ്ടു മത്സരങ്ങളിലിറങ്ങും. ലാസിയോ-ബ്രെസീഷ്യ പോരാട്ടവും സാംപദോറിയ- മിലാന് പോരാട്ടവും സാസൂവോളോ- ജെനോവ ഏറ്റുമുട്ടലും ഇന്നു തന്നെയാണ് ഇറ്റലിയില് നടക്കുന്നത്. ഇനി ലീഗില് വരും ദിവസങ്ങളില് ആകെ 13 മത്സരങ്ങളാണ് ബാക്കിയുള്ളത്. ലീഗിലെ അവസാന മത്സരങ്ങള് ആഗസ്റ്റ് മൂന്നാം തീയതി തിങ്കളാഴ്ചയാണ് നടക്കുക.