ലഖ്നൗ: ശ്രീരാമക്ഷേത്ര പുനര്നിര്മ്മാണത്തിന്റെ ശിലാസ്ഥാപനത്തിനായി അയോദ്ധ്യാ നഗരം ഉണര്ന്നു. ഇന്നു രാവിലെ 12.47നാണ് ചടങ്ങ് നടക്കുന്നത്. പ്രധാനമന്ത്രി നരേന്ദ്രമോദി ശിലാന്യാസം നടത്താന് ഇന്ന് 11.30 മണിയോടെ അയോദ്ധ്യാ നഗരത്തില് എത്തിച്ചേരും. സാകേത് സര്വ്വകലാശാല മൈതാനത്ത് ഹെലികോപ്റ്ററില് എത്തിച്ചേരുന്ന അദ്ദേഹം ആദ്യം ഹനുമാന് ക്ഷേത്രത്തില് ദര്ശനം നടത്തിയ ശേഷമാണ് ശിലാന്യാസച്ചടങ്ങിന്റെ വേദിയിലെത്തുക.
ശിലാന്യാസച്ചടങ്ങിലെ പ്രധാന സാന്നിധ്യമായി കണക്കാക്കുന്ന ആര്എസ്എസ് സര് സംഘചാലക് മോഹന് ഭാഗവത് ഇന്നലെത്തന്നെ അയോദ്ധ്യയിലെത്തി. ഉത്തര്പ്രദേശ് മുഖ്യമന്ത്രി യോഗി ആദിത്യനാഥ്, ഗവര്ണര് ആനന്ദി ബെന് പട്ടേല്, രാമക്ഷേത്ര ട്രസ്റ്റ് അദ്ധ്യക്ഷന് നൃത്യ ഗോപാല് ദാസ് എന്നിവരാണ് വേദി പങ്കിടുക. ലോകത്തിന്റെ വിവിധ സന്യാസി പരമ്പരകളുടെ പ്രതിനിധികളായ 135 പേര് ക്ഷേത്ര ട്രസ്റ്റ് ഭാരവാഹികളെക്കൂടാതെ ചടങ്ങിന് മേല്നോട്ടം വഹിക്കും. ആകെ 175 പേര്ക്കുമാത്രമാണ് ക്ഷണക്കത്ത് നല്കിയിരിക്കുന്നത്. പരിപാടിയില് പങ്കെടുക്കാനുള്ള ആദ്യ ക്ഷണക്കത്ത് നല്കിയത് കേസ് കോടതിയിലെത്തിച്ച ഇഖ്ബാല് അന്സാരിക്കാണ്. ക്ഷണം സ്വീകരിച്ച ഇഖ്ബാല് അന്സാരി പരിപാടിയില് പങ്കെടുക്കുമെന്ന് അറിയിച്ചിട്ടുണ്ട്.
അയോദ്ധ്യാ നഗരം ഇന്നലെ മുതല് ദീപാലങ്കാരങ്ങളാല് തിളങ്ങുകയാണ്. സരയൂ നദീ തീരത്ത് നിരവധി വേദികള് തീര്ത്ത് നദീപൂജയും തര്പ്പണവും ഇന്നലെ വിവിധ സന്യാസി സമൂഹങ്ങള് നടത്തി. 11000 ചിരാതുകള് തെളിയിച്ചാണ് ഇന്നലെ ദീപോത്സവവും ആരതിയും നടന്നത്. നിലവില് രാംലാല വിഗ്രഹം പ്രതിഷ്ഠിച്ചിരിക്കുന്ന ക്ഷേത്രത്തില് രാമാചര്ച്ചന നടന്നു.