വീണ്ടുമൊരു ഐപിഎൽ ക്രിക്കറ്റ് പൂരത്തിന് വേണ്ടി കാത്തിരിക്കുകയാണ് ക്രിക്കറ്റ് പ്രേമികൾ. കൊറോണ മാനദണ്ഡങ്ങൾ പാലിച്ചുകൊണ്ട് മത്സരങ്ങൾ നടത്താനുള്ള തയ്യാറെടുപ്പിലാണ് അധികൃതർ. ഇതിനിടെ ചൈനീസ് കമ്പനിയായ വിവോയെ ടൈറ്റിൽ സ്പോൺസർ സ്ഥാനത്തുനിന്ന് നീക്കുകയും ചെയ്തിരുന്നു. ഇപ്പോൾ പുതിയ ടൈറ്റിൽ സ്പോൺസറെ തേടുകയാണ് ബിസിസിഐ.
സ്പോൺസർഷിപ്പിനായി നിരവധി കമ്പനികൾ രംഗത്തെത്തിക്കഴിഞ്ഞു. ഇതിൽ മുൻപന്തിയിലുള്ളത് യോഗാചാര്യൻ ബാബാ രാംദേവിന്റെ പതഞ്ജലിയാണ്. കഴിഞ്ഞ ദിവസം ഒരു ദേശീയ മാദ്ധ്യമത്തോട് സംസാരിക്കവെ പതഞ്ജലിയുടെ വക്താവായ എസ് കെ ടിജരവാല ഇക്കാര്യം വ്യക്തമാക്കിയിരുന്നു. ഐപിഎല്ലിന്റെ ടൈറ്റിൽ സ്പോൺസറാവാൻ കഴിഞ്ഞാൽ പതഞ്ജലിക്ക് ആഗോള മാർക്കറ്റിൽ ഒരു പുതിയ മാനം കൈവരുമെന്നും അദ്ദേഹം ഇതിനൊപ്പം കൂട്ടിച്ചേർത്തു.
നേരത്തെ ആമസോൺ, അൺ അക്കാദമി തുടങ്ങിയവരും ലീഗിന്റെ ടൈറ്റിൽ സ്പോൺസറാവാൻ താല്പര്യം പ്രകടിപ്പിച്ചതായി റിപ്പോർട്ടുകൾ പുറത്തുവന്നിരുന്നു.
