ലിസ്ബണ്: ചാമ്പ്യന്സ് ലീഗില് പി.എസ്.ജി ഫൈനലില് കടന്നു. ഇന്നലെ നടന്ന മത്സരത്തില് ലീപ്സിഗിനെ എതിരില്ലാത്ത മൂന്നു ഗോളുകള്ക്ക് തകര്ത്താണ് പി.എസ്.ജി ചരിത്രത്തിലാദ്യമായി യൂറോപ്പിലെ ചാമ്പ്യന് ക്ലബ്ബാവാന് തയ്യാറായിരിക്കുന്നത്. മാര്ഖ്വിന്ഹോസും ആഞ്ചെല് ഡീ മരിയയും ജുവാന് ബെര്നറ്റ് വെലാസ്കോയുമാണ് പി.എസ്.ജിയ്ക്കായി ഗോളുകള് നേടിയത്.
കളിയുടെ എല്ലാ ഘട്ടത്തിലും ലീപ്സിഗിനേക്കാള് ഒരുപടി മുന്നില് നില്ക്കുന്ന പ്രകടനമാണ് നെയ്മറുടെ കീഴില് പി.എസ്.ജി നടത്തിയത്.ഗോള്മുഖത്ത് പക്ഷേ ഇരുടീമുകള്ക്കും തുല്യ അവസരം കിട്ടിയെങ്കിലും ലക്ഷ്യത്തിന് നേരെ 9 തവണ കിട്ടിയ അവസരങ്ങളില് മൂന്നെണ്ണം മുതലാക്കാന് നെയ്മര്ക്കും കൂട്ടര്ക്കുമായി. മികച്ച വോളികളുമായി ഇരുടീമുകളും മുന്നേറിയെങ്കിലും ഗോള് അടിയ്ക്കുന്നതില് പി.എസ്.ജി വിജയിച്ചു.
കളിയുടെ 13-ാം മിനിറ്റില് മാര്ക്വിനോസാണ് ആദ്യ ഗോള് നേടിയത്. തുടര്ന്ന് 42-ാം മിനിറ്റില് മരിയ ടീമിന്റെ രണ്ടാം ഗോളും നേടി. 56-ാം മിനിറ്റില് ലീപ്സിഗിന്റെ എല്ലാ പ്രതീക്ഷകളും തകര്ത്തുകൊണ്ട് വെലാസ്കോ മൂന്നാമത്തെ ഗോളും നേടി. ഇന്നു നടക്കുന്ന ബയേണ് മ്യൂണിച്ച്- ലയോണ് സെമിഫൈനല് വിജയിയെയാണ് പി.എസ്.ജി നേരിടുക.
