സതാംപ്ടണ്: ഇംഗ്ലണ്ടിനെതിരെ ഓസ്ട്രേലിയ ഏകദിന പരമ്പര സ്വന്തമാക്കി. മാക്സ്വെല്ലും വിക്കറ്റ് കീപ്പര് ബാറ്റ്സ്മാന് അലെക്സ് ക്യാരിയുമാണ് ഓസീസിന്റെ വിജയ ശില്പി. ഇംഗ്ലണ്ട് മുന്നോട്ട് വച്ച 303 റണ്സാണ് ഓസീസ് മറികടന്നത്. മൂന്നു വിക്കറ്റിനാണ് ഓസീസ് അവസാന നിമിഷത്തെ ആവേശത്തിനൊടുവില് ജയം നേടിയത്. അവസാന ഓവറിലെ നാലാം പന്തിലാണ് വിജയ റണ്സ് പിറന്നത്. മൂന്ന് ഏകദിന പരമ്പര 2-1നാണ് ഓസീസ് നേടിയത്.
ആറാം വിക്കറ്റില് 212 റണ്സിന്റെ കൂട്ടുകെട്ടാണ് മാക്സ്വെല്ലും അലെക്സ് ക്യാരിയും ചേര്ന്ന് എടുത്തത്. 90 പന്തുകളെ മാത്രം നേരിട്ടാണ് മാക്സ് വെല് നാല് ബൗണ്ടറികളും 7 സിക്സറുകളുമടക്കം 108 റണ്സ് നേടിയത്. കാ്യാരി 114 പന്തിലാണ് 106 റണ്സ് നേടിയത്. 7 ബൗണ്ടറികളും രണ്ടു സിക്സറുമാണ് ക്യാരി അടിച്ചത്. ഇംഗ്ലണ്ടിനായി വോക്സും ജോ റൂട്ടും രണ്ടു വിക്കറ്റുകള് വീതം വീഴ്ത്തി.
ആദ്യം ബാറ്റ്ചെയ്ത് ആതിഥേയര് ബെയര്സ്റ്റോവിന്റേയും(112) മധ്യനിരയില് ബില്ലിംഗ്സിന്റേയും(57), വോക്സിന്റേയും(53) ബാറ്റിംഗ് മികവിലാണ് 7 വിക്കറ്റ് നഷ്ടത്തില് 302 എന്ന മികച്ച സ്കോര് നേടിയത്. ഓസ്ട്രേലിയയ്ക്കുവേണ്ടി സ്റ്റാര്ക്കും സാംപയും മൂന്ന് വിക്കറ്റുകള് വീതം വീഴ്ത്തി.
