മുംബൈ: ഐ.പി.എല്ലില് സുരേഷ് റയ്നയുടെ അഭാവം ചെന്നൈ സൂപ്പര്കിംഗ്സിന്റെ വീര്യം കുറയ്ക്കുമെന്ന് മുന് ഓസീസ് താരം ഡീന് ജോണ്സ്. വ്യക്തിപരമായ കാരണങ്ങളാല് സുരേഷ് റയ്നയും ഹര്ഭജന് സിംഗും ചെന്നൈ നിരയില് ഇത്തവണ കളിക്കുന്നില്ല.
ചെന്നൈയുടെ ബാറ്റിംഗ് കരുത്തില് സുരേഷ് റയ്ന എന്നും നിര്ണ്ണായകമാണ്. മധ്യനിരയില് പ്രതിസന്ധി പരിഹരിക്കാന് പറ്റുന്ന ഇതുപോലൊരു താരമില്ലെന്നാണ് ജോണ്സ് പറയുന്നത്. ബാറ്റിംഗ് തകര്ച്ച ഒഴിവാക്കാനും അതിവേഗം റണ്സ് കയറ്റാനും റയ്നയ്ക്കുള്ള കഴിവ് കുറച്ചുകാണാനാകില്ലെന്നും ജോണ്സ് പറഞ്ഞു. ഐ.പി.എല്ലിന്റെ 12 സീസണുകളിലേയും ഏറ്റവും മികച്ച അഞ്ചു റണ് വേട്ടക്കാരില് ഒരാളാണ് റെയ്ന. ഇടംകയ്യന് ബാറ്റ്സ്മാന് എന്ന നിലയില് ബൗളര്മാര്ക്ക് റയ്ന എന്നും വെല്ലുവിളി ഉയര്ത്തുന്ന താരമാണെന്നും ജോണ്സ് പറഞ്ഞു.
റയ്നയുടേയും ഹര്ഭജന്റേയും അഭാവം എങ്ങനെ പരിഹരിക്കണമെന്നതില് ചെന്നൈയുടെ പരിശീലകന് സ്റ്റീഫന് ഫ്ലെമിംഗും നായകന് ധോണിയും എടുക്കുന്ന തന്ത്രങ്ങള്ക്കായി കാത്തിരിക്കുകയാണെന്നും ഡീന് ജോണ്സ് പറഞ്ഞു.
Comments