ന്യൂഡല്ഹി: 5ജി ടെക്നോളജിയിലെ ആപ്പിളിന്റെ ആദ്യ 5ജി സ്മാര്ട്ഫോണ് ആയ ഐഫോണ് 12 പുറത്തിറക്കി. ആപ്പിള് ഐഫോണ് 12ന്റെ നാലുമോഡലുകളാണ് ആപ്പിള് പുറത്തിറക്കിയത്. ആപ്പിള് ഐഫോണ് 12, ഐഫോണ് 12 മിനി, ഐഫോണ് 12 പ്രോ, ഐഫോണ് 12 പ്രോ മാക്സ് എന്നിവയാണ് പുറത്തിറക്കിയ മോഡലുകൾ. നീല, ചുവപ്പ്, കറുപ്പ്, വെള്ള, പച്ച എന്നിങ്ങനെ അഞ്ച് നിറങ്ങളിലാണ് ആപ്പിൾ ഐഫോൺ 12 ലഭ്യമാകുന്നത്.
അത്യാധുനിക സൗകര്യങ്ങള് ഐഫോണ് 12ൽ വാഗ്ദാനം ചെയ്യുന്നു. ലോകത്തിലെ ഏറ്റവും ചെറുതും കനം കുറഞ്ഞതും ഭാരം കുറഞ്ഞതുമായ 5ജി ഫോണ് ആണ് ഐഫോണ് 12 മിനിയെന്ന് ആപ്പിള് അവകാശപ്പെടുന്നു. താഴെ വീണാൽ പോലും ഫോണിന് ശക്തമായ സംരക്ഷണം നൽകുമെന്ന് കമ്പനി അവകാശപ്പെടുന്നു.
ടെലികോം കമ്പനിയായ വെരിസോണുമായി ചേര്ന്നാണ് ഐഫോണ് 12 ല് 5ജി സാങ്കേതിക വിദ്യ എത്തിക്കുന്നത്. ഡൗൺലോഡുകൾക്കും അപ്ലോഡുകൾക്കും 5 ജി ഒരു പുതിയ ലെവൽ നല്കുന്നു. കൂടാതെ ഉയർന്ന നിലവാരമുള്ള വീഡിയോ സ്ട്രീമിംഗ്, കൂടുതൽ പ്രതികരിക്കുന്ന ഗെയിമിംഗ്, തത്സമയ സംവേദനാത്മകത എന്നിവയും ഇതിലൂടെ ലഭ്യമാകുമെന്നാണ് കമ്പനി മേധാവി ടിം കുക്ക് വ്യക്തമാക്കുന്നത്.സെക്കന്റില് 4 ജിബിപിഎസ് ഡൗണ്ലോഡ് വേഗതയും 200 എംബിപിഎസ് അപ് ലോഡ് വേഗതയും ആർജിക്കാനാകും. അത്യാകര്ഷകമായ അലൂമിനിയം രൂപകല്പനയില് തയ്യാറാക്കിയിരിക്കുന്ന ഐഫോണ് 12, ഐഫോണ് 12 മിനി ഫോണുകളില് ഡ്യുവല് ക്യാമറ സംവിധാനമാണുള്ളത്.ഈ ഫോണുകള്ക്ക് യഥാക്രമം 6.1 ഇഞ്ച്, 2340 x 1080 പിക്സല് 5.4 ഇഞ്ച് സൂപ്പര് റെറ്റിന എക്സ്ഡിആര് ഡിസ്പ്ലേയാണുള്ളത്.
പരിസ്ഥിതി മലിനീകരണം കുറയ്ക്കുന്നതിന്റെ ഭാഗമായി ഐഫോണുകൾക്കൊപ്പം ചാർജറും ഹെഡ്ഫോണുകളും നൽകുന്നില്ല. പകരം ടൈപ്പ് സി കേബിൾ മാത്രമാണ് ഐഫോൺ 12 ബോക്സിലുണ്ടാകുക. ആപ്പിളിന്റെ ഏറ്റവും പുതിയ എ14 ചിപ്പ് ആണ് ഫോണില് ഉപയോഗിച്ചിരിക്കുന്നത്. മുൻ തലമുറ ചിപ്പുമായി താരതമ്യപ്പെടുത്തുമ്പോൾ 60 ശതമാനം വേഗമുള്ള ഗ്രാഫിക്സ് ഇത് വാഗ്ദാനം ചെയ്യുന്നു. 12 എംപി അൾട്രാ വൈഡ് ക്യാമറ + 12 എംപി വൈഡ് ആംഗിൾ ലെൻസുമായാണ് ഐഫോൺ 12 ലുള്ളത്. കുറഞ്ഞ വെളിച്ചത്തിൽ അതിശയകരമായ ചിത്രങ്ങൾ പകർത്താനാകുമെന്നതാണ് ഇതിന്റെ പ്രത്യേകതയായി കമ്പനി അവകാശപ്പെടുന്നത്.
ഐഫോൺ 12, ഐഫോൺ 12 മിനി എന്നിവ 64 ജിബി, 128 ജിബി, 256 ജിബി മോഡലുകൾക്ക് 69,900 രൂപ മുതൽ 79,900 രൂപ വരെയാണ് വില. ആപ്പിൾ ഡോട്ട് കോം, ആപ്പിൾ അംഗീകൃത റീസെല്ലറുകൾ എന്നിവ വഴിയാണ് വില്പ്പന. ഒക്ടോബർ 30 വെള്ളിയാഴ്ച മുതൽ ഐഫോൺ 12 പ്രോ ഇന്ത്യയിൽ ലഭ്യമാകും.
Comments