ലണ്ടൻ: ടോട്ടനത്തിന് വീണ്ടും കരുത്തേകി നായകന്റെ മടങ്ങിവരവ്. ഹാരീകെയിനാണ് കണങ്കാലുകളിലെ പരിക്ക് ഭേദമായി കളിച്ച ആദ്യ മത്സരത്തിൽ ടോട്ടനത്തിനെ ജയിപ്പിച്ചത്.പ്രീമിയർ ലീഗിൽ വെസ്റ്റ് ബ്രോംവിച്ചിനെ എതിരില്ലാത്ത രണ്ടു ഗോളുകൾക്കാണ് ടോട്ടനം തോൽപ്പിച്ചത്. രണ്ടു കണങ്കാലിനും ഒരു പോലെ പരിക്കേറ്റ് ഒരു മാസമെങ്കിലും പുറത്തിരിക്കേണ്ടി വരുമെന്ന അവസ്ഥയിൽ നിന്നാണ് ഹാരീ കെയിൻ പെട്ടന്ന് സുഖംപ്രാപിച്ചത്.
കളിയുടെ രണ്ടാം പകുതിയിലാണ് ഗോളുകൾ വീണത്. 54-ാം മിനിറ്റിലാണ് മടങ്ങിവരവ് വെറുതെയല്ലന്ന് തെളിയിച്ച് ഹാരീകെയിൻ ടീമിന് ആദ്യ ഗോൾ സമ്മാനിച്ചത്. ഹോജ്ബെർഗിന്റെ പാസ്സാണ് കെയിൻ ഗോളാക്കിയത്. നാലുമിനിറ്റിനകം നായകന്റെ ഉറച്ച പിന്തുണയിൽ മുന്നേറിയ സോൻ ഹ്യൂംഗ് മിൻ രണ്ടാം ഗോളും നേടി. ലൂകാസ് മൗരയുടെ പാസ്സാണ് മിൻ ഗോളാക്കി മാറ്റിയത്.
