ലണ്ടൻ: ചാമ്പ്യൻ പട്ടം നേടിനിൽക്കേ കഴിഞ്ഞ സീസണിലെ അവസാന മത്സരത്തിൽ തോൽപ്പിച്ച മാഞ്ചസ്റ്റർ സിറ്റിയോട് കണക്കു തീർക്കാൻ ലിവർപൂൾ സ്വന്തം തട്ടകത്തിൽ ഇന്നിറങ്ങുന്നു. ആൻഫീൽഡിലെ മത്സരം ലിവർപൂളിന് മുന്നേറാൻ മികച്ച അവസരമാണ്. ലീഗിൽ സിറ്റി ഒന്നാമതും ലിവർപൂൾ നാലാമതുമാണ്.
പരിക്കിൽ നിന്നും മോചിതരായ സാദിയോ മാനേയും ഫാബിനോയും ഇന്ന് കളിക്കാനിറങ്ങുമെന്ന പ്രതീക്ഷയിലാണ് ലിവർപൂൾ. അതേസമയം സിറ്റി സെർജിയോ അഗ്വിറോ, കെവിൻ ഡീ ബ്രൂണേ, നഥാൻ ആകേ എന്നിവരുടെ അഭാവത്തിലാണ് ഇറങ്ങുന്നത്.
2003ന് ശേഷം ഇതുവരെ ആൻഫീൽഡിൽ സിറ്റി ജയിച്ചിട്ടില്ല. ഒപ്പം ആൻഫീൽഡിലിറങ്ങിയ 19ൽ 13 മത്സരങ്ങളും വിവിധ ടീമുകൾക്കെതിരെ തോറ്റതും സിറ്റിക്ക് തിരിച്ചടിയാണ്. അതേസമയം സിറ്റിയെ 17 തവണ ആൻഫീൽഡിൽ ലിവർപൂൾ തന്നെയാണ് തോൽപ്പിച്ചിട്ടുളളത്. എന്നാൽ ആൻഫീൽഡിൽ കഴിഞ്ഞ മൂന്ന് മത്സരങ്ങൾ ഈ സീസണിൽ തോറ്റതിന്റെ ക്ഷീണത്തിലാണ് ആതിഥേയർ.
