മിലാൻ: ഇറ്റാലിയൻ ലീഗിലെ തന്റെ അറുന്നൂറാം മത്സരത്തിൽ ടീമിന് ജയം സമ്മാനിച്ച് ക്രിസ്റ്റ്യാനോ. സ്‌പേസിയക്കെതിരെ യുവന്റസ് എതിരില്ലാത്ത മൂന്ന് ഗോളുകൾക്കാണ് ജയം നേടിയത്.
കളിയുടെ രണ്ടാം പകുതിയിലാണ് മൂന്ന് ഗോളുകളും വീണത്. 62-ാം മിനിറ്റിൽ ആൽവാരോ മൊറാത്തയാണ് ആദ്യ ഗോളടിച്ചത്. ബെർണാഡേഷിയുടെ പാസാണ് ഗോളാക്കി മാറ്റിയത്. 71-ാം മിനിറ്റിൽ ചെസിയ രണ്ടാം ഗോളും നേടി. 89-ാം മിനിറ്റിലാണ് ക്രിസ്റ്റ്യാനോയുടെ ഗോൾ വീണത്. ബെന്റാക്വറിന്റെ പാസാണ് പോർച്ചുഗൽ താരം വലയിലെത്തിച്ചത്.
സീരി എയിൽ സീസണിലെ തന്റെ 20-ാം ഗോളും ക്രിസ്റ്റ്യാനോ തികച്ചു. യൂറോപ്പിലെ 5 സുപ്രധാന ലീഗുകളിലായി കഴിഞ്ഞ 12 സീസണുകളിലും 20 ഗോളിൽ കുറയാതെ സ്‌കോർ ചെയ്യുന്ന ആദ്യതാരമായി ക്രിസ്റ്റ്യാനോ മാറി. ജയത്തോടെ ലീഗിൽ എസി.മിലാന് പിന്നിൽ യുവന്റസ് മൂന്നാം സ്ഥാനത്തേക്ക് കയറി.
