മുംബൈ: ഇംഗ്ലണ്ടിനെതിരായ രണ്ടാം ഏകദിനത്തിൽ അർദ്ധ സെഞ്ച്വറി പ്രകടനവുമായി ഇന്ത്യൻ നായകൻ വിരാട് കോഹ്‌ലി. 79 പന്തിൽ 66 റൺസ് നേടിയ കോഹ്‌ലി ഇന്ത്യൻ ഇന്നിംഗ്‌സിന് മികച്ച അടിത്തറ പാകിയ ശേഷമാണ് മടങ്ങിയത്. അർദ്ധ സെഞ്ച്വറിക്ക് പിന്നാലെ മറ്റൊരു റെക്കോഡ് കൂടി ഇന്ത്യൻ നായകനെ തേടിയെത്തി.
ഏകദിന മത്സരങ്ങളിൽ മൂന്നാമനായിറങ്ങി 10,000 റൺസ് നേടുന്ന രണ്ടാമത്തെ ബാറ്റ്‌സ്മാൻ എന്ന നേട്ടമാണ് കോഹ്‌ലി സ്വന്തം പേരിൽ കുറിച്ചത്. മുൻ ഓസ്‌ട്രേലിയൻ നായകൻ റിക്കി പോണ്ടിംഗാണ് ഈ നേട്ടം സ്വന്തമാക്കിയ ആദ്യ താരം. 12,662 റൺസാണ് പോണ്ടിംഗിന്റെ അക്കൗണ്ടിലുള്ളത്. മൂന്ന് ഫോർമാറ്റുകളിലുമായി 22,869 റൺസാണ് പോണ്ടിംഗ് സ്വന്തമാക്കിയത്.
66 റൺസ് കൂടി നേടിയതോടെ മൂന്നാം സ്ഥാനത്തിറങ്ങി കോഹ്‌ലി 10,046 റൺസാണ് നേടിയിരിക്കുന്നത്. നിലവിൽ മത്സര രംഗത്തുള്ളവരിൽ ന്യൂസിലൻഡ് നായകൻ കെയ്ൻ വില്യംസണാണ് കോഹ്‌ലിക്ക് പിന്നിലുള്ളത്. എന്നാൽ കോഹ്‌ലിയേക്കാൾ 5,421 റൺസ് പിന്നിലാണ് വില്യംസൺ. പരമ്പരയിലെ ആദ്യ മത്സരത്തിൽ സ്റ്റീവ് സ്മിത്തിനെ മറികടന്ന് ഏകദിന മത്സരങ്ങളിൽ ഏറ്റവും കൂടുതൽ റൺസ് നേടുന്ന അഞ്ചാമത്തെ നായകൻ എന്ന നേട്ടവും കോഹ്‌ലി സ്വന്തമാക്കിയിരുന്നു.
