മുംബൈ: ഇന്ത്യൻ ക്രിക്കറ്റ് ചരിത്രത്തിലെ എക്കാലത്തെയും മികച്ച ഓപ്പണിംഗ് ജോഡികളായാണ് സച്ചിൻ-ഗാംഗുലി സഖ്യം വിലയിരുത്തപ്പെടുന്നത്. കണക്കുകൾ പരിശോധിച്ചാൽ ലോകത്തിലെ തന്നെ ഏറ്റവും മികച്ച സഖ്യവും ഇവർ തന്നെയാണ്. എന്നാൽ, ഇംഗ്ലണ്ടിനെതിരായ മൂന്നാം ഏകദിനത്തിൽ പടുത്തുയർത്തിയ സെഞ്ച്വറി കൂട്ടുകെട്ടിലൂടെ രോഹിത് ശർമ്മയും ശിഖർ ധവാനും സച്ചിൻ-ഗാംഗുലി സഖ്യത്തിനൊപ്പം മികച്ച ഓപ്പണിംഗ് ജോഡികളുടെ പട്ടികയിൽ ഇടം നേടിയിരിക്കുകയാണ്.
ഏകദിന മത്സരങ്ങളിലെ ഒന്നാം വിക്കറ്റ് കൂട്ടുകെട്ടിൽ 5,000 റൺസ് തികച്ച ബാറ്റിംഗ് ജോഡികളുടെ പട്ടികയിൽ രോഹിത്തും ധവാനും ഇടംനേടി. ഒന്നാം വിക്കറ്റിൽ 103 റൺസിന്റെ കൂട്ടുകെട്ട് ഉണ്ടായതോടെയാണ് ഇരുവരും അപൂർവ നേട്ടം സ്വന്തമാക്കിയത്. 112 ഇന്നിംഗ്സുകളിൽ നിന്നും 5,023 റൺസാണ് ഇരുവരും കൂട്ടിച്ചേർത്തത്. ഇതോടെ സച്ചിൻ-ഗാംഗുലി ജോഡികൾക്ക് ശേഷം ഈ നേട്ടം സ്വന്തമാക്കുന്ന രണ്ടാമത്തെ ഇന്ത്യൻ ജോഡികളാണ് രോഹിത്തും ധവാനും.
176 ഇന്നിംഗ്സുകളിൽ നിന്നും 8,227 റൺസ് നേടിയ സച്ചിൻ ഗാംഗുലി സഖ്യമാണ് പട്ടികയിൽ ഒന്നാമത്. മഹേല ജയവർധന-കുമാർ സംഗക്കാര സഖ്യം 5,992 റൺസ് കൂട്ടുകെട്ടുമായി രണ്ടാം സ്ഥാനത്തുണ്ട്. 108 ഇന്നിംഗ്സുകളിൽ നിന്നും 5,475 റൺസ് വാരിക്കൂട്ടിയ തിലകരത്നെ ദിൽഷൻ-കുമാർ സംഗക്കാര സഖ്യമാണ് മൂന്നാമത്. ആദം ഗിൽക്രിസ്റ്റ്-മാത്യ ഹെയ്ഡൻ(117 ഇന്നിംഗ്സുകളിൽ 5,409 റൺസ്), ഗോർഡൻ ഗ്രീനിഡ്ജ്-ദേസ്മോണ്ട് ഹൈനെസ് (103 ഇന്നിംഗ്സുകളിൽ 5,026 റൺസ്) എന്നിവരാണ് രോഹിത്-ധവാൻ സഖ്യത്തിന് മുന്നിലുള്ളത്.
