ലണ്ടൻ: ഇംഗ്ലീഷ് പ്രീമിയർ ലീഗിൽ ഞായറാഴ്ച മത്സരത്തിൽ സതാംപ്ടണിനും ആസ്റ്റൺ വില്ലയ്ക്കും ജയം. അതേ സമയം മൂന്നാം മത്സരത്തിൽ ടോട്ടനത്തിന് ന്യൂകാസിലിനോട് സമനില വഴങ്ങേണ്ടിവന്നു. സതാംപ്ടൺ 3-2ന് ബേൺലിയേയും ആസ്റ്റൺ വില്ല 3-1 ഫുൾഹാമിനേയുമാണ് തോൽപ്പിച്ചത്. ടോട്ടനവും ന്യൂകാസിലും തമ്മിൽ രണ്ടു വീതം ഗോളടിച്ചാണ് സമനിലയിൽ പിരിഞ്ഞത്.
സതാംപ്ടൺ ബേൺലി മത്സരത്തിൽ സതാംപ്ടണിനായി ആംസ്ട്രോഗ്, ഇംഗ്സ്, റെഡ്മോണ്ട് എന്നിവർ ഗോളുകൾ നേടിയപ്പോൾ ബേൺലിക്കായി വുഡും വൈഡ്രയുമാണ് ഗോളുകൾ നേടിയത്. ആസ്റ്റൺ വുൾഹാം മത്സരത്തിൽ ആസ്റ്റണിനായി ട്രേഗൗട്ട് ഇരട്ടഗോളുകളും വാറ്റ്കിംഗ്സിന്റെ ഏക ഗോളുമാണ് വിജയം സമ്മാനിച്ചത്. ഫുൾഹാമിനായി മിട്രോവിച്ചാണ് ആശ്വാസ ഗോൾ നേടിയത്.
ഹാരീകെയിന്റെ വീരോചിത പോരാട്ടം ജയമാക്കിമാറ്റാൻ ടോട്ടനത്തിനായില്ല. കളിയുടെ 28-ാം മിനിറ്റിൽ ന്യൂകാസിൽ ജോലിന്റണിലൂടെയാണ് മുന്നിലെത്തിയത്. എന്നാൽ തുടരെ രണ്ടു ഗോളുകളടിച്ചുകൊണ്ടാണ് ഹാരീ കെയിൻ ടീമിനെ മത്സരത്തിലേക്ക് തിരികെ എത്തിച്ചത്. എന്നാൽ കളിയുടെ 85-ാം മിനിറ്റിൽ വില്ലോക്കിലൂടെ ന്യൂകാസിൽ ടോട്ടനത്തിന്റെ വിജയം തട്ടിയെടുക്കുകയായിരുന്നു.
