കോപ്പന്‍ഹേഗന്‍: യൂറോ കപ്പ് ഫുട്ബോൾ മത്സരത്തിനിടെ ഡെൻമാർക്ക് താരം മൈതാനത്ത് കുഴഞ്ഞുവീണു. ഫിന്‍ലന്‍ഡിനെതിരായ മത്സരത്തില്‍ ഡെൻമാർക്കിന്റെ ക്രിസ്റ്റ്യൻ എറിക്സണാണ് കളത്തിൽ കുഴഞ്ഞുവീണത്. ഗ്രൗണ്ടില്‍ കുഴഞ്ഞുവീണ താരത്തെ പ്രാഥമിക ശുശ്രൂഷയ്‌ക്ക് ശേഷം വിദഗ്ധ ചികിത്സയ്‌ക്ക് വേണ്ടി ആശുപത്രിയിലേക്ക് മാറ്റി.
മത്സരത്തിനിടെ എറിക്സൺ കുഴഞ്ഞുവീണത് കണ്ട് റഫറി മത്സരം നിർത്തിവെച്ചു. തുടര്‍ന്ന് യൂറോ കപ്പില്‍ ഗ്രൂപ്പ് ബിയിലെ ഡെന്‍മാര്‍ക്ക് – ഫിന്‍ലന്‍ഡ് മത്സരം റദ്ദാക്കുന്നതായി യുവേഫ ഔദ്യോഗികമായി അറിയിച്ചു.
നിലവിൽ ആശുപത്രിയിൽ കഴിയുന്ന എറിക്സണ് അപകടനില തരണം ചെയ്തതായി യുവേഫ വ്യക്തമാക്കിയിട്ടുണ്ട്. അതേസമയം, ക്രിസ്റ്റ്യൻ എറിക്സണ് വേണ്ടി പ്രാർത്ഥനയിലാണ് ഫുട്ബോൾ ലോകം.
