എല്ലാ വര്ഷവും ജൂണ് മാസം രണ്ടാം ശനിയാഴ്ചയാണ് എലിസബത്ത് രാജ്ഞിയുടെ ഔദ്യോഗിക ജന്മദിനം ആഘോഷിക്കുന്നത്. ഇത്തവണ യുകെയിലെ കോണ്വാളില് നടന്ന ജി സെവന് ഉച്ചകോടിക്കിടെയായിരുന്നു ജന്മദിന ആഘോഷം .
വിദ്യാഭ്യാസ ചാരിറ്റി പ്രവര്ത്തനങ്ങളുടെ ഭാഗമായി ഏതന് പ്രോജക്ട് ആണ് ഉച്ചകോടിക്കിടെ വിരുന്ന് സംഘടിപ്പിച്ചത്. എലിസബത്ത് രാജ്ഞിയോടൊപ്പം കോണ്വാള് രാജകുമാരി കമീല, കേംബ്രിഡ്ജ് രാജകുമാരി കേറ്റ് മിഡില്ടണ് എന്നിവരും പങ്കെടുത്തു. ലോകത്തെ വിവിധ രാഷ്ട്രങ്ങളില് നിന്നുള്ള വിശിഷ്ടവ്യക്തികള്ക്കായി സംഘടിപ്പിച്ച പരിപാടിയില് രാജ കുടുംബത്തിലെ മൂന്നു തലമുറകള് ഒരുമിച്ച് പങ്കെടുത്തു എന്നതും ചടങ്ങിന്റെ പ്രത്യേകതയാണ്.
മുറിക്കാനുള്ള കേക്കിന് സമീപം കത്തി ഉണ്ടായിരുന്നു. എന്നാല് എലിസബത്ത് രാജ്ഞി വാള് ഉപയോഗിക്കുകയായിരുന്നു. ഇതിനിടെ കത്തി അവിടെ ഇരിപ്പുണ്ട് എന്ന് രാജ്ഞിയെ ഓര്മിപ്പിച്ചെങ്കിലും എനിക്കറിയാം എന്ന് പറഞ്ഞു കൊണ്ട് രാജ്ഞി വാളുപയോഗിച്ച് കേക്ക് മുറിക്കുകയായിരുന്നു. കേക്കില് വാളുപയോഗിച്ച് വെട്ടാന് തോന്നാത്തത് നന്നായി എന്നും രാജ്ഞിയുടെ വാള് കൈകാര്യം ചെയ്യാനുള്ള വൈദഗ്ധ്യത്തെ അഭിനന്ദിച്ചും നിരവധി ആളുകള് ട്വിറ്റ് ചെയ്തു. ജി സെവന് രാഷ്ട്രങ്ങളുടെ ഉച്ചകോടി കഴിഞ്ഞ വെള്ളിയാഴ്ചയാണ് തുടങ്ങിയത്.
കൊറോണ പ്രതിരോധം, കാലാവസ്ഥാ വ്യതിയാനം എന്നീ വിഷയങ്ങള് കേന്ദ്രീകരിച്ചാണ് ഉച്ചകോടിയിലെ ചര്ച്ചകൾ നടന്നത്. ദരിദ്ര രാഷ്ട്രങ്ങള്ക്കായി 1 ബില്യണ് വാക്സിന് ലഭ്യമാക്കുമെന്നും ഉച്ചകോടിയിൽ തീരുമാനമെടുത്തു.
