കർണ്ണാടക: കൊറോണ നിയന്ത്രണങ്ങളിൽ റോഡുകൾ വിജനമായതിനെ തുടർന്ന് മൃഗങ്ങൾ പൊതുനിരത്തുകളിൽ സഞ്ചരിക്കുന്ന നിരവധി വാർത്തകൾ പുറത്തുവന്നിട്ടുണ്ട്. അത്തരത്തിൽ കൗതുകമുള്ള ഒരു വാർത്തയാണ് കർണാടകയിലെ ഉത്തര കന്നഡ ജില്ലയിലെ കോഗിലബന്ന ഗ്രാമത്തിൽ നിന്നും വരുന്നത്. കോഗിലബന്ന ഗ്രാമത്തിലെ പൊതുവഴിയിലൂടെ പുലർച്ചെ ഒരു മുതല സഞ്ചരിക്കുന്നത് കണ്ട് നാട്ടുകാർ അമ്പരന്നു.
ഗ്രാമത്തിൽ നിന്ന് 5 കിലോമീറ്റർ അകലെയുള്ള ദണ്ടേലി വന്യജീവി സങ്കേതത്തിനടുത്തുള്ള കാളി നദിയിൽ നിന്നാണ് മുതല ഗ്രാമത്തിലെത്തിയതെന്നാണ് നാട്ടുകാർ പറയുന്നത്. മുതല ഗ്രാമത്തിലൂടെ സഞ്ചരിക്കുന്ന വീഡിയോയും സമൂഹ മാദ്ധ്യമങ്ങളിൽ ഇതിനോടകം വൈറലായി കഴിഞ്ഞു.
ഗ്രാമവാസികൾ പിന്നാലെ പിന്തുടരുമ്പോഴും മുതല സാധാരണഗതിയിൽ വീടുകൾക്ക് സമീപത്തുകൂടെ ഇഴഞ്ഞു നീങ്ങുന്നതായാണ് വീഡിയോയിൽ കാണുന്നത്. തുടർന്ന് പ്രദേശവാസികൾ വനം വകുപ്പ് ഉദ്യോഗസ്ഥരെ വിവരം അറിയിച്ചു. വനംവകുപ്പ് ഉദ്യോഗസ്ഥർ സ്ഥലത്തെത്തി മുതലയെ പിടിച്ച് നദിയിലേക്ക് തന്നെ സുരക്ഷിതമായി വിട്ടയച്ചു .
Comments