ദുബായ്: 2028ൽ ലോസ് ആഞ്ചലസിൽ വെച്ച് നടക്കുന്ന ഒളിമ്പിക്‌സിൽ ക്രിക്കറ്റിനെ ഉൾപ്പെടുത്തണമെന്ന് ഐസിസി (ഇന്റർനാഷൽ ക്രിക്കറ്റ് കൗൺസിൽ) ആവശ്യപ്പെട്ടു. ഇതിനായി ഒരു ഒളിമ്പിക് വർക്കിങ്ങ് കൂട്ടായ്മ രൂപവത്കരിച്ചിരുന്നു. ഈ കൂട്ടായ്മ ഒളിമ്പിക്‌സിൽ ക്രിക്കറ്റിനെ ഉൾപ്പെടുത്തുന്നതിനായി ശക്തമായി പ്രവർത്തിക്കുമെന്ന് ഐസിസി അറിയിച്ചു.
90 ശതമാനം ആളുകളും ക്രിക്കറ്റിനെ സ്‌നേഹിക്കുന്നവരാണ്. ഈ ആവശ്യം ശക്തമാണെന്നും ഒളിമ്പിക്‌സിൽ ഉൾപ്പെടുത്തുന്നതോടെ ക്രിക്കറ്റിന്റെ ഭാവി തെളിയുമെന്നും ഐസിസി ചെയർമാൻ ഗ്രെഗ് ബാർക്ലേ അഭിപ്രായപ്പെട്ടു. കൊറോണയുടെ പശ്ചാത്തലത്തിലും വളരെ ഭംഗിയായി ടോക്കിയോ ഒളിമ്പിക്‌സ് പൂർത്തീകരിക്കാൻ സാധിച്ചതിന് സംഘാടകരെ അദ്ദേഹം പ്രത്യേകം അഭിനന്ദിച്ചു.
ക്രിക്കറ്റിന് വൻ ആരാധക പിന്തുണയാണുള്ളത്. ഏകദേശം 92 ശതമാനം ആരാധകരും ദക്ഷിണ ഏഷ്യൻ രാജ്യക്കാരാണ്. യുഎസ്എയിൽ നിന്നും 30 മില്യൺ ആളുകളും ക്രിക്കറ്റിനെ ഇഷ്ടപ്പെടുന്നു. ഒളിമ്പിക്‌സിൽ സ്ഥാനം പിടിക്കുന്നതോടെ ആരാധകർക്ക് അവരുടെ ഇഷ്ടതാങ്ങളുടെ ഒളിമ്പിക് പ്രകടനം കാണുവാൻ സാധിക്കും.
ഐസിസി ഒളിമ്പിക് വർക്കിങ്ങ് കൂട്ടായ്മയുടെ ചെയർമാനായി ഇംഗ്ലണ്ട് ആൻഡ് വെയിൽസ് ക്രിക്കറ്റ് ചെയർമാൻ ഇയാൻ വാട്‌മോറിനെ നിയമിക്കുമെന്നും അദ്ദേഹം അറിയിച്ചു.
