എറണാകുളം : അത്താണിയിൽ ഷവർമ്മ കഴിച്ചവർക്ക് ഭക്ഷ്യവിഷബാധയേറ്റു. പുതുശ്ശേരിയിലെ ബേക്കറിയിൽ നിന്നും ഷവർമ്മ കഴിച്ച എട്ട് പേർക്കാണ് വിഷബാധയേറ്റത്. സംഭവത്തിൽ ബേക്കറി ഉടമ ആന്റണിയെ (64) പോലീസ് അറസ്റ്റ് ചെയ്തു.
ചെങ്ങമനാട് സ്വദേശികളായ ഗോകുൽ സോമൻ (23), റെനൂബ് രവി (21), ജിഷ്ണു വേണു(25), ശ്രീരാജ് സുരേഷ് (24), അമൽ കെ അനിൽ (23), കുന്നുകര സ്വദേശി സുധീർ സലാം (35), മക്കളായ ഹൈദർ, ഹൈറ എന്നിവർക്കാണ് വിഷബാധയേറ്റത്. ഇവർ ആശുപത്രിയിൽ ചികിത്സയിലാണ്. ഇവരുടെ നില തൃപ്തികരമാണെന്ന് ആശുപത്രി അധികൃതർ അറിയിച്ചു.
വെള്ളിയാഴ്ച വൈകീട്ടാണ് ഇവർ ബേക്കറിയിൽ നിന്നും ഷവർമ്മ കഴിച്ചത്. രാത്രിയോടെ അവശനിലയിലാകുകയായിരുന്നു. ആശുപത്രിയിൽ ചികിത്സ തേടിയതോടെയാണ് ഭക്ഷ്യവിഷബാധയാണെന്ന് വ്യക്തമായത്. തുടർന്ന് ഇവർ കളക്ടർക്ക് പരാതി നൽകി.
കളക്ടറുടെ നേതൃത്വത്തിലുള്ള പോലീസ് സംഘമെത്തി ബേക്കറി പൂട്ടിച്ചു. വിവരം അറിഞ്ഞ് ഭക്ഷ്യസുരക്ഷാ ഓഫീസറും ബേക്കറിയിൽ പരിശോധന നടത്തി. ഷവർമ്മയ്ക്കൊപ്പം നൽകിയ മയോണൈസിൽ നിന്നാണ് വിഷബാധയേറ്റത് എന്നാണ് പ്രാഥമിക നിഗമനം.
