ലക്നൗ : ഭഗവാൻ ശ്രീരാമന്റെ അനുഗ്രഹം തേടി രാഷ്ട്രപതി രാംനാഥ് കോവിന്ദ് ഇന്ന് അയോദ്ധ്യയിലെ രാമജന്മ ഭൂമിയിൽ. നാല് ദിവസത്തെ ഉത്തർപ്രദേശ് സന്ദർശനത്തിന് ഭാഗമായാണ് അദ്ദേഹം രാജന്മഭൂമിയിൽ എത്തുന്നത്. ക്ഷേത്രത്തിലെ പ്രത്യേക പൂജകളിൽ അദ്ദേഹം പങ്കെടുക്കും.
വിവിധ സർക്കാർ പദ്ധതികളുടെ ഉദ്ഘാടനം ഉൾപ്പെടെ നിർവ്വഹിക്കാനാണ് രാഷ്ട്രപതി യുപിയിൽ എത്തുന്നത്. രാമജന്മഭൂമി സന്ദർശിക്കുന്ന അദ്ദേഹം ക്ഷേത്രത്തിന്റെ നിർമ്മാണ പ്രവർത്തനങ്ങൾ വിലയിരുത്തും. അയോദ്ധ്യയിലെ തുളസി സ്മാരക് ഭവൻ, നഗർ ബസ് സ്റ്റാന്റ് എന്നിവയുടെ നവീകരണ പ്രവർത്തനങ്ങൾക്ക് അദ്ദേഹം തുടക്കമിടും. ടൂറിസം വകുപ്പിന്റെ വിവിധ വികസന പദ്ധതികൾക്കും അദ്ദേഹം തുടക്കം കുറിക്കും.
ഡൽഹിയിൽ നിന്നും തീവണ്ടിമാർഗ്ഗമാണ് അദ്ദേഹം യുപിയിൽ എത്തുക. രാഷ്ട്രപതിയുടെ യാത്രയ്ക്ക് ആവശ്യമായ എല്ലാ സുരക്ഷാ ക്രമീകരണങ്ങളും പൂർത്തിയായതായി ഇന്ത്യൻ റെയിൽവേ അറിയിച്ചു. സുരക്ഷയുടെ ഭാഗമായി അയോദ്ധ്യവഴി പോകുന്ന ചില തീവണ്ടികൾ വഴിതിരിച്ച് വിട്ടിട്ടുണ്ട്.
അതേസമയം രാഷ്ട്രപതിയെ സ്വീകരിക്കാൻ അയോദ്ധ്യയും രാമജന്മഭൂമിയും ഒരുങ്ങിക്കഴിഞ്ഞു.
