ആലപ്പുഴ: വിലക്ക് ലംഘിച്ച് ലോറി കയറ്റിയതോടെ താൽകാലിക പാലം തകർന്നു. ആലപ്പുഴ-ചങ്ങനാശേരി റോഡിൽ ഗതാഗതം തടസ്സപ്പെട്ടു. പൊങ്ങ പാലത്തിനുസമീപത്തുള്ള താല്കാലിക പാലമാണ് തകർന്നത്. ഇന്ന് രാവിലെയാണ് സംഭവം.
അന്യസംസ്ഥാനത്തുനിന്നും എത്തിയ ലോറിയാണ് പാലം തകർത്തത്. സെക്യൂരിട്ടി ജീവനക്കാരൻ തടയാൻ ശ്രമിച്ചെങ്കിലും ഇതു വകവെയ്ക്കാതെ പാലത്തിലേക്കു ലോറി കയറ്റുകയായിരുന്നുവെന്ന് ദൃക്ഷാക്ഷികൾ പറഞ്ഞു. ഇതേ തുടർന്ന് പ്ലൈവുഡ് കൊണ്ട് നിർമ്മിച്ച പാലത്തിൽ ലോറി കുടുങ്ങി. പിന്നീട് നിർമ്മാണ ചുമതലയുള്ള കമ്പനിയുടെ ക്രെയിൻ ഉപയോഗിച്ചാണ് ലോറി നീക്കിയത്.
പാലം തകർന്നതിനെ തുടർന്ന് ഇതുവഴി ഇരുചക്രവാഹനങ്ങളടക്കമുള്ള വാഹനങ്ങളുടെ ഗതാഗതം തടസ്സപ്പെട്ടു. പൊങ്ങ പാലം പൊളിച്ചു നീക്കുന്നതിന്റെ ഭാഗമായിട്ടാണ് താൽകാലിക പാലം നിർമ്മിച്ചത്. പ്രദേശ വാസികളുടെ ചെറുവാഹനങ്ങൾക്കും ആംബുലൻസുകൾക്കും മാത്രമാണ് ഇതുവഴി ഗതാഗതം അനുവദിച്ചിരുന്നത്. ഇക്കാര്യം അറിയാതെയെത്തിയ ലോറിയാണ് അപകടത്തിൽ പെട്ടത്.
Comments