തിരുവനന്തപുരം: കേരള പത്രപ്രവർത്തക യൂണിയൻ തിരുവനന്തപുരം ജില്ലാ കമ്മിറ്റി സംഘടിപ്പിക്കുന്ന കേസരി – സമീറ കപ്പ് ഫുട്ബോൾ ടൂർണമെന്റിൽ ജനം ടിവി ഫൈനലിൽ. രണ്ടിനെതിരെ മൂന്ന് ഗോളുകൾക്ക് കേരള കൗമുദിയെ പരാജയപ്പെടുത്തിയാണ് ജനംടിവി ഫൈനലിൽ കടന്നത്.
വിനു, ജിനേഷ്, വിഷ്ണു എന്നിവർ ജനം ടിവിക്ക് വേണ്ടി ഗോൾ നേടിയപ്പോൾ കേരളകൗമുദിക്ക് വേണ്ടി ശ്യാമും മഹേഷും ലക്ഷ്യം കണ്ടു. ഫൈനലിൽ അമൃത ടിവിയെയാണ് ജനം ടിവി നേരിടുക.
ദേശാഭിമാനിയെ രണ്ടിനെതിരെ മൂന്ന് ഗോളുകൾക്ക് പരാജയപ്പെടുത്തിയാണ് അമൃത ഫൈനലിൽ എത്തിയത്. അമൃതക്ക് വേണ്ടി ശ്രീനാഥ് പള്ളത്ത്, അർജുൻ മാറോളി, ഷിബിൻ എന്നിവരാണ് ഗോൾ നേടിയത്. ദേശാഭിമാനിയുടെ രണ്ട് ഗോളുകളും മനോജാണ് നേടിയത്. ആദ്യ പകുതിയിൽ ഓരോ ഗോളുകൾ നേടി സമനില പാലിച്ചെങ്കിലും രണ്ടാം പകുതിയിൽ അമൃത മുന്നേറുകയായിരുന്നു.
ഷൂട്ടൗട്ടിലൂടെ വിജയികളെ തീരുമാനിച്ച ലൂസേഴ്സ് ഫൈനലിൽ രണ്ടിനെതിരെ നാല് ഗോളുകൾക്ക് ദേശാഭിമാനിയെ പരാജയപ്പടുത്തി കേരള കൗമുദി മൂന്നാം സ്ഥാനക്കാരായി.
Comments