എറണാകുളം : അണക്കെട്ട് തുറക്കുന്നതുമായി ബന്ധപ്പെട്ട് വ്യാജ വാർത്തകൾ പ്രചരിപ്പിച്ചാൽ കർശന നടപടി. എറണാകുളം ജില്ലാ കളക്ടർ ജാഫർ മാലിക്ക് ആണ് ഇക്കാര്യം അറിയിച്ചത്. അണക്കെട്ടുകളെക്കുറിച്ചുള്ള ഭീതിജനകമായ വാർത്തകളും സന്ദേശങ്ങളും സമൂഹമാദ്ധ്യമങ്ങളിൽ പ്രചരിക്കുന്നുണ്ട്. ഇതേ തുടർന്നാണ് കർശന നടപടി സ്വീകരിക്കുമെന്ന് കളക്ടർ അറിയിച്ചത്.
ഫേസ്ബുക്കിലൂടെയാണ് കളക്ടർ ഇക്കാര്യം വ്യക്തമാക്കിയത്. അണക്കെട്ടുകൾ തുറക്കുന്നതുമായി ബന്ധപ്പെട്ട് വ്യാജവാർത്തകൾ പ്രചരിക്കുന്നവർക്കെതിരെ കർശന നടപടി സ്വീകരിക്കുമെന്ന് കളക്ടർ പറഞ്ഞു.
അതേസമയം ജലനിരപ്പ് ഉയർന്നതിനെ തുടർന്ന് ഇടമലയാർ അണക്കെട്ടിന്റെ ഷട്ടറുകൾ ഉയർത്തി. രാവിലെ ആറ് മണിയ്‌ക്ക് രണ്ട് ഷട്ടറുകളാണ് ഉയർത്തിയത്. നിലവിൽ 80 ക്യൂബിക്ക് മീറ്റർ / സെക്കന്റ് ജലമാണ് തുറന്നു വിടുന്നത്. ഇത് 100 ക്യൂബിക്ക് മീറ്റർ / സെക്കന്റിലെത്തും
