ന്യൂഡൽഹി : ഹിന്ദുത്വത്തെ ഇസ്ലാമിക് സ്റ്റേറ്റുമായി താരതമ്യം ചെയ്ത സംഭവത്തിൽ കോൺഗ്രസ് നേതാവ് സൽമാൻ ഖുർഷിദിനെതിരെ ബിജെപി നേതാവ് രാം കദം പോലീസിൽ പരാതി നൽകും. ഖാട്ട്കോപാർ നഗർ പോലീസ് സ്റ്റേഷനിലെത്തി രാവിലെ 11 30 ന് പോലീസിന് പരാതി കൈമാറുമെന്ന് അദ്ദേഹം അറിയിച്ചു. ട്വിറ്ററിലൂടെയായിരുന്നു സൽമാൻ ഖുർഷിദിനെതിരെ പരാതി നൽകുമെന്ന വിവരം ബിജെപി നേതാവ് പുറത്തുവിട്ടത്.
മതവികാരം വ്രണപ്പെടുത്തിയെന്ന് ചൂണ്ടിക്കാട്ടിയാണ് അദ്ദേഹം ഖുർഷിദിനെതിരെ പരാതി നൽകുക. പുസ്തകത്തിലൂടെ കോടിക്കണക്കിന് ഹിന്ദുക്കളുടെ മതവികാരമാണ് ഹനിക്കപ്പെട്ടത്. അതിനാൽ ഹിന്ദുത്വത്തെ ഇസ്ലാമിക ഭീകരതയുമായി ബന്ധിപ്പിച്ച കോൺഗ്രസ് നേതാവിനെതിരെ പരാതി നൽകുമെന്ന് രാംകദം അറിയിച്ചു.
അയോദ്ധ്യയിലെ രാമക്ഷേത്രം നിർമ്മിക്കുന്നതിനായി നടത്തിയ നിയമ പോരാട്ടവും, അന്തിമ വിധിയും പ്രതിപാദിച്ചുകൊണ്ടുള്ള സൺറൈസ് ഓവർ അയോദ്ധ്യ എന്ന പുസ്തകത്തിലാണ് സൽമാൻ ഖുർഷിദ് ഹിന്ദുത്വത്തെ ഐഎസുമായി ബന്ധിപ്പിച്ചുകൊണ്ട് പരാമർശിച്ചത്. കോടതിവിധിയെ ഒരു മതത്തിന്റെ വിശ്വാസത്തിന് ലഭിച്ച മേൽക്കോയ്മയെന്ന് വിശേഷിപ്പിച്ച ഖുർഷിദ് ഹിന്ദുത്വത്തെ ഇസ്ലാമിക് സ്റ്റേറ്റുമായും, ബോക്കോ ഹറാമുമായും താരതമ്യം ചെയ്യുകയായിരുന്നു. പരാമർശങ്ങളിൽ സൽമാൻ ഖുർഷിദിനെതിരെ വലിയ പ്രതിഷേധമാണ് ഉയരുന്നത്.
Comments