ഡെൽഹി: ജവഹർലാൽ നെഹ്‌റു സർവ്വകലാശാലയിൽ എബിവിപി പ്രവർത്തകർക്ക് നേരെ ഇടത് വിദ്യാർത്ഥി സംഘടനകളുടെ ആക്രമണം. ജെഎൻയു ക്യാമ്പസിലെ ഹാളിനുള്ളിൽ എബിവിപിയുടെ യൂണിറ്റ് യോഗം നടക്കുന്നതിനിടെ സംഘടിച്ചെത്തിയ ഐസ, എസ്എഫ്‌ഐ പ്രവർത്തകരാണ് ആക്രമിച്ചത്.
സംഭവത്തിൽ ഗുരുതരമായി പരിക്കേറ്റ ദിവ്യാംഗനടക്കമുള്ള രണ്ട് എബിവിപി പ്രവർത്തകരെ ഡെൽഹി ആൾ ഇന്ത്യാ ഇൻസ്റ്റിറ്റിയൂറ്റ് ഓഫ് മെഡിക്കൽ സയൻസിൽ (എയിംസ്) പ്രവേശിപ്പിച്ചു.
ജെഎൻയു വിദ്യാർത്ഥി യൂണിയൻ ഭാരവാഹികളടക്കമുള്ളവരാണ് ആക്രമണത്തിന് നേതൃത്വം നൽകിയതെന്ന് പരിക്കേറ്റ വിദ്യാർത്ഥികൾ പറഞ്ഞു. കഴിഞ്ഞ ദിവസം രാത്രി 10 മണിയോടെയാണ് അക്രമം നടന്നത്. സംഭവത്തിൽ പ്രതിഷേധിച്ച് എബിവിപി പ്രവർത്തകർ ക്യാമ്പസിൽ പ്രകടനം നടത്തി. ആക്രമണം നടത്തിയവരെ തിരിച്ചറിഞ്ഞിട്ടുണ്ടെന്നും ഉടൻ അറസ്റ്റ് ചെയ്യുമെന്നും വസത് കുഞ്ച് പോലീസ് അറിയിച്ചു.
