ദുബായ്: അടുത്ത എട്ട് വർഷത്തേക്കുളള പ്രധാന ടൂർണമെന്റുകളുടെ പട്ടികയും ആതിഥേയത്വം വഹിക്കുന്ന രാജ്യങ്ങളുടെ പേരും ഐസിസി പ്രസിദ്ധീകരിച്ചു. നാല് ടി20 ലോകകപ്പുകളും രണ്ട് ചാമ്പ്യൻസ് ട്രോഫികളും രണ്ട് ഏകദിന ലോകകപ്പുകളും ഉൾപ്പെടുന്ന 2024നും 2031നും ഇടയിലുള്ള ടൂർണമെന്റുകളുടെ പട്ടികയാണ് പുറത്തിറക്കിയത്.
2024ലെ ടി20 ലോകകപ്പിന്റെ അമേരിക്ക സഹആതിഥേയരാകും. വെസ്റ്റ് ഇൻഡീസാണ് അമേരിക്കയോടൊപ്പം ആതിഥേയരാകുന്നത്. 2025ലെ ചാമ്പ്യൻസ് ട്രോഫി പാകിസ്താനും അനുവദിച്ചു. 1996ലെ ഏകദിന ലോകകപ്പിന്റെ സഹ ആതിഥേയരായ പാകിസ്താൻ പിന്നീട് ഐസിസിയുടെ പ്രധാനപ്പെട്ട ടൂർണമെന്റുകൾക്ക് വേദിയായിട്ടില്ല. 2027 ഏകദിന ലോകകപ്പ് ദക്ഷിണാഫ്രിക്ക, സിംബാബ്വെ, നമീബിയ എന്നിവിടങ്ങളിൽ നടക്കും.
അതേസമയം 2029ലെ ചാമ്പ്യൻസ് ട്രോഫി ഇന്ത്യയിൽ നടക്കും. ശ്രീലങ്കയ്ക്കൊപ്പം ഇന്ത്യ 2026 ടി 20 ലോകകപ്പും സംയുക്തമായി നടത്തും. ഇന്ത്യ 2031 ഏകദിന ലോകകപ്പിന് ബംഗ്ലാദേശുമായി സഹ ആതിഥേയത്വം വഹിക്കുകയും ചെയ്യും.
2028ൽ ടി 20 ലോകകപ്പിന് ഓസ്ട്രേലിയയും ന്യൂസിലാന്റും സംയുക്തമായി ആതിഥേയത്വം വഹിക്കും. 2030ൽ ടി20 ലോകകപ്പിന് ഇംഗ്ലണ്ട്, അയർലൻഡ്, സ്കോട്ട്ലൻഡ് എന്നീ രാജ്യങ്ങൾ വേദിയാകും.
2024 ടി20 ലോകകപ്പ്: യുഎസ്എയും വെസ്റ്റ് ഇൻഡീസും
2025 ചാമ്പ്യൻസ് ട്രോഫി: പാകിസ്താൻ
2026 ടി20 ലോകകപ്പ്: ഇന്ത്യയും ശ്രീലങ്കയും
2027 ഏകദിന ലോകകപ്പ്: നമീബിയ, സിംബാബ്വെ, ദക്ഷിണാഫ്രിക്ക
2028 ടി20 ലോകകപ്പ്: ഓസ്ട്രേലിയയും ന്യൂസിലൻഡും
2029 ചാമ്പ്യൻസ് ട്രോഫി: ഇന്ത്യ
2030 ടി20 ലോകകപ്പ്: ഇംഗ്ലണ്ട്, അയർലൻഡ്, സ്കോട്ട്ലൻഡ്
